Eskalatzeko 31 bide berri, Bedartzandin
Bizkaiko Mendi Federazioak, Aulestiko Udalaren eta Bizkaiko Foru Aldundiaren laguntzaz, Bedartzandiko gunea egokitu du eskalatzaileentzat. Hiru gunetan banatuta, 31 bide berri jarri dituzte, 10 eta 60 metro artekoak; erabilera librea edukiko dute.
Aulestiko Santa Eufemi ingurua eskalatzaileentzako gune egokia dela sinetsita, Aulestiko Udalaren, Bizkaiko Foru Aldundiaren eta Bizkaiko Mendi Federazioaren elkarlanari esker eskalada gune berria ipini dute martxan Bedartzandin. Guztira 31 bide berri eskaintzen ditu gune berriak, eta prestakuntza lanak Bizkaiko Mendi Federazioak egin ditu.
Jakitera eman dutenez, hastapenerako nahiz esperientziadun eskalatzaileentzat prestatuko bideak eskaintzen ditu guneak, 10 metrotik 60 metrora arteko luzeeradun ibilbideekin. Gainera, mailak ere, askotarikoak dira: 3. gradutik 7A gradura artekoak. “Bide batzuek luzeetan jarduteko aukera ematen dute, 60 metroko altuera hartzen dutenak, maniobrak eta bestelako hainbat kontu ikasteko. Eta gero hirugarren gradutik hasi eta 7A gradura arteko ibilbideak daude”.
Hastapeneko eskalada eskola ipintzeko aukeratutako tokia ere, ez da ausazkoa izan: “Bizkaiko Mendi Federazioko kideok ikusi genuen Lea-Artibain ez zegoela eskaldarako aukera handirik, eta uste dugu garrantzitsua dela kirol hau egiteko aukera ematea bertoko biztanleei ere, gune dotore batean. Horregatik, Bedartzandiko lekua ikusita, pila bat aukera eskaini zitzazkeela konturatu ginen, batez ere, hastapeneko eskalada eskola bat sortzeko.”. BFAk kirol instalazioak egiteko inbertitzen duen dirua baliatu dute gunea egiteko, eta Aulestiko lurrak direnez geroztik, udalak ere jardun du lekua ixten nahiz bestelako lanak egiten.
Santa Eufemin badago beste eskalada gune bat ere, baina hegaztien babeserako murrizketa neurriak ditu. Bedartzandikoak, ostera, erabilera guztiz librea edukiko du: “Hastapenerako gune zoragarri bat da, maila denetarako. Oso pozik gaude emaitzarekin”. Hala, Santa Eufemin informazio-panel bat ipini dute bidera nondik heldu eta bide bakoitzaren ezaugarriak azaltzen dituena.
Hiru gune. Hiru gunetan banatu dituzte bideak. Beheko guneari dagokionez, A, B eta C zatietan banatu dituzte bideak. A zatiak hiru bide edukiko ditu: bik 30 metro inguru edukiko dituzte, eta hirugarrenak, 15 metro. 5B, 5C eta 6B+ mailetakoak dira. B zatiak bost bide edukiko ditu 20 eta 24 metro bitartekoak eta 6A+, 6B+ eta 7A mailetakoak. C zatiak, aldiz, lau bide edukiko ditu, 11 eta 15 metro bitartekoak, denak ere, laugarren mailakoak. Bestalde, erdiko guneari dagokionez, bederatzi bide edukiko ditu, 15 eta 40 metro bitartekoak eta hiru eta lau mailetakoak. Azkenik, goiko gunean hamar bide egongo dira, denak ere, 20 metrotik eta laugarren mailatik gorakoak.
