Domekan izango da Ispasterko zaldi mandoen eta kintopekoen sariketarako izen ematea
Sariketa otsailaren 13tik 16ra eta 20tik 22ra egingo dute. Izen ematea domekan [urtarrilak 18] 12:00etatik 14:00etara izango da, Ispasterko udaletxean.
Jatetxe Nabarnizeko ordezkariak manta eta txapelagaz. Argazkia: Ispasterko Udala Ispasterko Udalak antolatuta, Zaldi Mandoen 41. Sariketa eta Kintopekoen 31. Sariketa hartuko ditu Ispasterrek otsailean, eta domekan [urtarrilak 18] egongo da izena emateko aukera. Ispasterko udaletxean egin beharko da izen ematea, 12:00etatik 14:00etara, eta animalien identifikazio zenbakia eta mikrotxipa, explotazio kodea eta jabearen datuak aurkeztu beharko dira.
Otsailaren 13tik 16ra eta 20tik 22ra ospatuko dituzte sariketak, eta sari potoloak egongo dira jokoan. Sari orokorrei dagokienez, irabazleak 800 euro, udalaren manta eta txapela eskuratuko ditu; bigarren sailkatuak 700 euro eskuratuko ditu eta hirugarrenak, 600 euro. Laugarren eta bosgarren sailkatuek 500 euro, seigarren eta zazpigarren sailkatuek, 450 euro, zortzigarren eta bederatzigarrenek, 400 euro, hamargarrenak, 350 euro eta hamaika eta hamabigarren sailkatuek 300 euro eskuratuko dituzte. Horrez gain, kintopeko sariei dagokienez, irabazleak 300 euro, Ispasterko manta eta txapela eskuratuko ditu; bigarren sailkatuak, 200 euro eta hirugarrenak, 150 euro. Lau, bost eta seigarren sailkatuek ere, sariak edukiko dituzte.
Gaineratu dutenez, saririk jaso gabe geratzen diren baina irabazlearen markaren %70 egiten dutenek 300 euro jasoko dituzte. Era berean, Lea-Artibaiko hiru partaidek parte hartuko balute (gutxienez), honako sariak banatuko lituzkete: lehenengoarentzat 120 euro, bigarrenarentzat, 100 euro eta hirugarrenarentzat, 90 euro.
Baldintzak. Bi mailetan pisu bereko Ispasterko harria erabiliko dute partaideek. Era berean, abereen oinarrizko pisua 400 kilokoa izango da, eta gorako kilo bakoitzeko karga hartu beharko dute; pisaketa proben hasiera baino ordubete lehenago egingo dute. Probak Bizkaiko kirol Federakundeak kontrolatuko ditu, eta antolatzaileak ahalmena dauka edozein aldaketa egiteko.
