Udalak zaintza langileak lan eskubideetan alfabetatzeko liburuak kaleratuko ditu
Etxeko eta zaintzako langileak lan eskubideetan trebatzeko bilduma kaleratuko du Berriatuko Udalak, foro feministarekin elkarlanean egindakoa. Lehen alea zapatuan aurkeztuko diete zaintza langileei, 15:30ean, kultur etxe berrian.
Berriatuko Udalak 'Lan Eskubideetan alfabetatzeko lehen koadernoa etxeko eta zaintzako langileentzat' liburuxka argitaratu du Etxeko eta zaintzako langileak eta horien eskubideak lehen lerrora eramateko helburuagaz, Berriatuko Udalak Lan Eskubideetan alfabetatzeko lehen koadernoa etxeko eta zaintzako langileentzat liburuxka argitaratu du. Zaintza duin, publiko eta komunitarioa aldarrikatu, eta zaintzaileen zein zainduen bizitzak erdigunean jartzea eskatzeko, 2023ko azaroan Euskal Herriko mugimendu feministak deituriko Greba Feminista Orokorraren testuinguruan dauka jatorria egitasmoak, orduan Berriatuko talde feministak herriko barneko langileak non zeuden identifikatu, eta horiengana hurbiltzen hasteko lanketa abiatu baitzuen. Lehenengo liburuxkaren argitalpenarekin hurbiltze horretan jarraitu gura dute, eta horretarako, zaintza langileei liburua aurkezteko hitzordua jarri dute zapaturako [urtarrilak 17], 15:30ean, kultur etxe berrian.
Zaintzak erdigunean lelopean egindako grebarekin, orduan sortutako eztabaidekin eta etxeko eta zaintzako langileekin izandako lehen hurbilketekin udalerrian zaintzaileen egoera zein zen identifikatzeko eta, batez ere, «langileekin hartu-emana estutzeko» beharra antzeman zutela gogoratu dute udaleko Berdintasun Sailetik. Orduan, Berriatuko etxe eta zaintza langileen kontaketa egiteari ekin zioten.
Emagin Elkarteak eta Berritxuko Neskak talde feministak udalerriko II. Berdintasun Plana jorratu zuten udalagaz, eta horretan, genero arteko berdintasunaren errealitatea ikusarazteko egindako diagnostikoaren emaitzak bistaratzearekin batera, gabeziak konpontzeko zenbait neurri ere biltzen ziren, tartean, foro feministaren sorrera bultzatzea: «2024an, Berritxuko Foro Feminista martxan zegoela, ordura arte mugimendu feministak egindako saretzearen testigua hartu zuen». Mugimendu feministak, herritarrek eta udalak parte hartzen dute foro feministan, eta horretan, «zaintzaileekin lanketa egiteko beharrizana» dagoela identifikatu dute, «batez ere, beraien eskubideetan alfabetatzeko eta elkar ezagutza sustatzeko».
Sei liburuxka.
Halaber, finkatutako helburuetan, langileek herrian duten presentzia handitzea ere zehaztu dute, eta horretarako, identifikazio lana egin eta Whatsapp taldea eratu zuten: «Whatsapp taldea sortu zen, beraien artean hartu-emanean egon ahal izateko, eta gainera, saio bat ere antolatu zen».
Prozesu horretan, foro feministak eta Berdintasun Sailak Tania Cañas Sirianay aditu eta Hegoaldetik Enarak Kooperatibako kidea izan dute bidelagun: «Hasierako asmoa zen elkar ezagutu, alfabetatu eta beharrak ezagutzeko saio batzuk antolatzea, horiei buelta emateko planteamendua osatzeko. Prozesuan, baina, talde hori modu jarraitu batean batzeko nahikoa zailtasun agertu ziren». Orduan, hartu-emanari jarraipena eman, eta alfabetatzea bermatzeko liburuxka sorta argitaratzea otu zitzaien, lehenengo alea zapatuan aurkeztuko dutena izanik.
Liburu bilduma sei liburuxkagaz osatuta egotea aurreikusi dute, bakoitzean «gai ezberdinak» jorratzeko. Liburuak «premien arabera» kaleratzea erabaki dute, eta horregatik, lehenengoan, lan-kontratua, lan-eskubideak, jarduna, ordainsaria, barneko langileen erregularizazioa eta baimenak jorratu dituzte, besteak beste: «Legeak jasotzen duena bermatzeko informazioa jaso da. Beraientzat errazena eta hurbilekoena denarekin hasi gara, hasierako saioek ez funtzionatzearen atzean euren aldetik zegoen eszeptizismo puntu bat ere bazegoelako. Udaletik beraiekin harremanetan jarri gara, baina euretako batzuen egoera konplexua da, eta beldurra ere tartean sartzen da. Horregatik, liburuxka honekin, beraiengana gehiago hurbildu, eta beraiek harkorrago egon daitezela bilatu dugu».
Gainontzeko bost liburuxkak ere aurten argitaratzea aurreikusi dute, datak guztiz zehazteke badituzte ere, «hilero edo bi hilabeterik behin» liburuxka bat kaleratuz. Horietan «gai ezberdinak» jorratuko dituztela azaldu dute, esaterako, lan osasuna edo oporraldiak. Era berean, bildumako bi liburu Berriatua bera ezagutzera emateko baliatuko dituzte: «Liburu bat herria bera ezagutzera zuzenduta egongo da; herritar denentzako, zaintzaileetatik haratago ere baliagarri izango ahalko litzatekeena. Herrian anbulatorioa bakarrik ezagutzen dute askok, eta horrez gain, herrian egon daitezkeen zerbitzu eta baliabideak beraien eskura jartzeko izango da. Berriatuaren aurkezpena ere izango da, ze ohitura, hizkuntza edota jardun dagoen ezagutarazteko, baita erroldatzeko zer prozedura bete behar den jakinarazteko ere».
Zaintzaileen egoera hobetzearen ardura guztia ez dute zaintzaileengan jarri gura izan, eta horregatik, langileak kontratatzen dituztenek jakin beharreko informazio baliagarriagaz osatuko dute liburuetako bat: kontratuek gutxienez jaso beharrekoak, Gizarte Segurantzan zer kotizatu behar den… «Eskubideak bermatze aldera, familiek eta orokorrean zaintzaileek kontratatzen dituztenek jakin beharrekoak jasoko dira». Argitalpena «herriko kontzientzia lantzeko» leiho legez ikusten dute.
Ikuspegi antiarrazista eta feminista.
Etxeko eta zaintzako langileen lan eskubideen alfabetatzea «ikuspegi antiarrazista eta feministatik» garatzen ari direla nabarmendu dute arduradunek: «Ez da gauza bera zaintzaren inguruan ikuspegi asistentzialista batetik hitz egitea edo hor dagoen arrazalizazioa eta feminizazioa kontutan hartuta berba egitea. Prozesu honen aberasgarritasunetako bat da beti izan dugula kontuan emakumeak direla gehienbat beste aldean daudenak, eta gero eta gehiago direla arrazalizatuak eta askotan, baldintza oso prekarioetan dagoen jendea dela. Hiru premisa horien arabera begiratzen diogu zaintzari».
Liburuxkak euskaraz eta gazteleraz argitaratuko dituzte, «zaintzailearen profila gaztelera hiztuna» delako orokorrean. Halere, zaintzaz hitz egitean, euskara txertatzea «garrantzitsua» dela uste dute, eta horregatik prozesuan zehar «euskara ikusgarri» egin nahi izan dute. Horrenbestez, zaintzaileak euskara ikastera animatu gura dituzte, «baita kontratatzaileek euskalduntze prozesuan laguntzeko erraztasunak ipintzera ere».
Aurkezpena, langileentzat.
Aurkezpena zapatuan egingo badute ere, lehen alea argitaratu dute dagoeneko —paperean zein udalaren webgunean—eta orain arteko harrera «ona» izan da: «Eskura eman nahi izan diegu, eta azaltzeko geratzean, esker oneko agertu direla antzeman dugu». Cañas ere zapatuko hitzorduan egongo da, eta langileei zalantzaren bat edo beste sortu baldin bazaie, bertan argitzeko aukera izango dute. Proiektuaren bultzatzaileei eta Cañasi berari ere garrantzitsua iruditu zaie liburuaz gain, «aurrez aurreko espazioak eta sarea elikatzen joatea», eta horregatik, hasierako asmoa behintzat liburuxka bakoitzarekin aurrez-aurreko saioa egitea da. Izan ere, langile asko beraien artean ere ezagutzen ez direnaz jabetu ziren. Sustatzaileek hurrengo liburuxketarako prestatutako ideiak ere plazaratuko dizkiete bertan, eta bertaratutakoek aurreikusita ez dagoen gairen baten falta sumatuz gero, aintzat hartuko dute.
Aurkezpena etxeko eta zaintzako langileentzat izango da soilik, eta gazteleraz egingo dute: «Zaindu behar den taldea dela uste dugu, eta horrelako testuinguru batean babestuago sentitu daitezke. Herriaren hartu-emana izatea garrantzitsua da, baina euren problematika zehatzen inguruan berba egiteko espazioa ematea da asmoa».
