"Auzo txikiak berrindartzeko" asmoz, badatoz San Anton jaiak Barinagara
Bihartik [urtarrilak 16] domekara [urtarrilak 18] bitarte ospatuko dituzte jaiak. Besteren artean, VI. Kalamua-Barinaga jaitsiera, artzain txakur erakustaldia, 'Eukaliptus' antzezlanaren emanaldia eta bertso afaria egingo dituzte.
Barinagako zenbait auzotar, iazko jaietan. Herri eta auzoetako jai gehienak uda inguruan izaten diren arren, Markina-Xemeingo Barinagako auzotarrek urtarrilean ospatzen dute euren eguna. San Anton egunagaz batera egiten dituzte ospakizunak, eta aurtengoan ere hala izango da: barikuan [urtarrilak 16] hasi eta domekara [urtarrilak 18] arte jai giro bete-betean murgilduko dira. Barinagako Jai Batzordeak “auzo txikiak berrindartzeko apustua” berretsi du beste urte batez, eta jai eta ekintzetan parte hartzera gonbidatu dituzte auzotar nahiz herritarrak.
Berritasunik egongo ez den arren, zenbait aldaketa egin dituzte: “Domekan egingo dugun Briska Txapelketa, esaterako, berreskuratu eta aurten berriro egingo dugu. Bestalde, domekarako programatu ohi dugun antzezlana zapatu arratsaldean egitea erabaki dugu. Eta azkenik, iaz egin genuen artzain txakurren erakustaldia bigarrenez egingo dugu”. Era berean, jubilatuen bazkaria iaz barikuan egin zuten arren, aurtengoan domekan [urtarrilak 18] egitea erabaki dute.
Hala, bihar [urtarrilak 16] kirola izango da protagonista. Arratsaldea hasteko gaztetxoen pilota partidak egingo dituzte, eta ostean, pala txapelketako finalak: “Atzo [urtarrilak 14] iluntzean jokatu zituzten finalaurrekoak. Mutiletan hogei partaide egon dira, eta nesketan, zortzi. Mutilen finala Joseba eta Mikelek jokatuko dute, eta neskena, Onintzak eta Aiorak“.
Egun handia. Aurtengoan San Anton egunak bat egingo du zapatuagaz [urtarrilak 17], eta pozik hartuko dute hori auzotarrek. Eguna VI. Kalamua-Barinaga jaitsieragaz hasiko dute: “Normalean ekintza arrakastatsua izaten da, eta aurten ere, hala izatea espero dugu. Ikuskizuna ematen duen ekintza da, ze, goitik behera egiten den lasterketa da”. Izena emateko aukera dago oraindik www.kirolprobak.com web orrian.
Lasterketa amaitzeagaz batera, artzai txakur erakustaldia egongo da: “Iaz gustura hartu zuten auzotarrek, eta aurten berriro egitea pentsatu dugu”. Hala, Igor Elordi auzotarra egongo da bere txakurragaz, eta Ipar Arrinda lekeitiarragaz osatuko du taldea; indarrak neurtuko dituzte Jon Olivares zeanuritarraren eta Mikel Etxebarria dimoztarraren aurka: “Lea-Artibairen eta Arratiaren arteko lagunarteko lehia izango da, eta Iñaki Urberuaga aulestiarra ariko da esatari lanetan”.
Arratsaldeari hiru txirloko txapelketagaz ekingo diete: “Aurretik zenbait jaurtialdi egiten ibiltzen dira, eta gero txapelketa egiten dute. Parte hartu nahi duenak nahikoa da momentuan agertzea”. 18:30ean, ostera, Eukaliptus antzezlana ikusteko aukera egongo da: “Jon Ander Urrestik eta Beñat Urrutiak interpretatzen dute. Aulestin estreinatu zen Geuretik Sortuak bekaren barruan, eta monokultiboen inguruko irakurketa egiten du”. Mikel Unamunzaga auzotarrak eta Nerea Ibarzabal herritarrak parte hartu zuten obraren sorkuntzan, eta jakitera eman dutenez, obra ikusteko azkenetariko aukera izango da Barinagakoa.
Bertaratzen direnak gosetzen direnerako, auzotarrek prest edukiko dute afaria: “Bertso afaria urteroko hitzordua izaten da batzuentzako, eta jendetxoa elkartzen gara beti. Jaien antolakuntzan ez gara jende asko ibiltzen, baina afarirako ia denok inplikatzen gara: janaria prestatzen, zerbitzen, jasotzen… Bakoitzak ahal duena egiten du”. Hala, sarrerakoak, arrain zopa, okela eta Opelako pastela eta izozkia jango dituzte; afarirako tiketak salgai daude Kontzeju-Zahar tabernan edo Baskaran estankoan 35 euroren truke (ikasle eta langabetuak, 25 euro). Ostean, auzoa eta auzotarrak ondo ezagutzen dituzten bi bertsolari egongo dira kantuan: Nerea Ibarzabal Salegi eta Andoni Egaña Makazaga. Gaiak jartzen, ostera, Joseba Sololuze ariko da. Eguna amaitzeko Laja II eta Lutxurdio trikitilariak ariko dira, eta goizaldean berakatz zopa jango dute.
Jaiei amaiera emateko, jubilatuek euren eguna ospatuko dute. Goizeko mezaren ostean, bazkaritarako elkartuko dira; izena eman daiteke Kontzeju-Zahar tabernan edo 632 85 62 48 telefonora deituz. Arratsaldeko Briska Txapelketarekin emango diete amaiera jaiei.
Egitaraua.
Bihar, urtarrilak 16.
- 17:00. Gaztetxoen arteko pilota partiduak.
- 19:00. Pala txapelketako finalak.
- Iluntzean. Su artifizialak.
Etzi, urtarrilak 17.
- 12:00. VI. Kalamua-Barinaga jaitsiera.
- 12:30. Artzai txakur erakustaldia.
- 17:00. Hiru txirlo.
- 18:30. ‘Eukalyptus’ antzezlana.
- 21:00. Bertso afaria: Nerea Ibarzabal Salegi eta Andoni Egaña Makazaga.
- Ostean. Laja II eta Lutxurdixo trikitilariak.
Domeka, urtarrilak 18.
- 12:15. Meza nagusia.
- Ostean. Meza ostekoa.
- 14:00. Jubilatuen bazkaria.
- 17:00. Briska txapelketa.
