Mikele Irazustaren muralak eraikitako zubia
Mikele Irazustak Euskal Diasporaren Egunerako sortutako muralak mundu osoko kaleko artearen mapan jarri du Markina-Xemein. Bekobenta kaleko murala 2025eko munduko muralik onena izateko hautagai da; bozketa zabalik egongo da urtarrilaren 31ra arte.
Bekobenta kaleko hamargarren zanbakian dago horma-irudia.Mikele Irazusta Horma bat margoz estaltzen denean, ez da irudi huts bat soilik. Memoria, identitatea eta sustraiak ere horman itsatsita geratzen dira, eta horixe gertatu da Mikele Irazusta muralgileak Markina-Xemeinen Euskal Diasporaren Egunerako margotutako muralarekin: zesta puntari eskainitako lanak herriko kale batetik abiatu, eta mundu osoko artezaleen begirada bereganatu du.
Urrian Street Art Cities atariak hilabeteko mural onenen artean aukeratu zuen lana, eta arte zaleen botoei esker, hirugarren postua eskuratu zuen. Horri esker, 2025eko munduko mural onenen finalera sailkatu da: “Sekulako poza da. Urrian gertatutakoa lorpen handia izan zen, baina orain, urte osoko mural onenen artean egotea, harrotasun itzela da. Gehien hunkitzen nauena edukitzen ari den oihartzuna da, eta muralak hartu duen esanahia identitate, kultura, kirola nahiz bestelako esparruak elkartuz”.
Irazustak deitura euskaldunak dituen arren, euskal diasporaren parte den argentinarra da: “Nire aiton-amonak donostiarrak ziren, eta beraz, diasporaren parte ere banaiz. Niretzat eta nire familikoentzat sekulakoa izan da Euskal Diasporaren Egunerako mural bat margotzea, izan ere, lotura estua daukagu Euskal Herriarekin. Nire bihotzaren zati bat Euskal Herrian dago, zalantzarik barik”.
Arkitektura ikasi zuen arren, muralgintzan “gero eta lan gehiago” eskatzen zizkioten Irazustari 2018an, eta profesionalki horretara dedikatzeko apustua egin zuen. Ordutik, 200 mural baino gehiago egin ditu: “Argentinan, Uruguayn, Espainiako hegoaldean eta Euskal Herrian egin ditut muralak. Euskal Herrian, Markina-Xemeingo muralaz gain, Orioko hondartzako Mola-Mola tabernan dago nik egindako beste lan bat, eta zenbait lan pribatu ere egin ditut”.
Bekobenta kaleko hamargarren zanbakian dago horma-irudia.Mikele Irazusta
Hasieran mural txikiagoak egiten zituen arren, teknika ikasteagaz batera lanen eskala handitzen joan zen, eta espazio publikoan halako artelanek duten eraginagaz jabetu zen. Hala, Markina-Xemeingo muralak ondo islatzen du jauzi kualitatibo hori: “Sei solairuko eraikin batean egin nuen murala, eta erronka handia izan zen. 15 metroko altuera eta 9 metroko zabalera ditu; halako tamainako lanak egin ditut aurretik ere, baina horizontalean. Horregatik, bertikalean egitea erronka handia izan da, baina emaitzarekin oso pozik nago, bai ikuspegi estetikotik, bai hirigintzaren ikuspegitik”.
Erronka profesionalaz gain, muralak kalean sortutako erreakzioak ere azpimarratu ditu: auzokideak, galderak, begiradak eta jakin mina. “Jendea gelditu egiten zen, galdetu egiten zidaten eta prozesua ikusten geratzen ziren. Oso polita izan zen guzti hori bizitzea. Oso ondo zaindu zidaten han egon nintzen egunetan”. Horregatik, etorkizunera begira, Euskal Herrira itzuli nahiko luke: “Familiaren zati bat bertan daukat, eta aurretik ere egon izan naiz Euskal Herrian. Bertara joateko aitzakia bila aritzen naiz beti, ze, familiarekin egoteaz gain, arrasto artistikoa uzteko aukera edukitzeak ilusio handia egiten dit. Artearen bidez zubi gehiago sortzen jarraitzea gustatuko litzaidake, eta asko gustatuko litzaidake beste mural bat egitera itzultzea”.
Bozketa, zabalik. 2025eko mural onena aukeratzeko bozketa zabalik egongo da urtarrilaren 31ra arte, eta bertan dago Irazustak Markina-Xemeingo Bekobentako 10. zenbakian egindako lana ere; streetartcities.com atarian Awards atalera sartu, eta bertan dago Irazustaren lana bozkatzeko moduan.
Hala, artista argentinarrak eskerrak eman dizkie orain arte haren lana babestu duten guztiei, eta Markina-Xemeingo murala bozkatzeko deia egin du: “Asko eskertzen dut orain arte denon artean lortu dugun dena; ziur nago final honetan ere jendearen babesa sekulakoa izango dela. Kaleetako hormak margotzen jarraitu dezagun nahiko nuke, norbere herriko identitatea apur bat gehiago adierazi eta espazio publikoan bizipen aberasgarriagoa eduki dezagun”.
Ver esta publicación en Instagram
