Ortiz eta Mendibil eta Aldazabal, desafioaren jabe
Maite Ortiz de Mendibilek eta Maialen Aldazabalek Azpeitiko Winter Series Desafioan garaipen boteretsua lortu dute. Gizonezkoen partiduan, Eñaut Urreistik eta Imanol Lopezek asteleheneko [urtarrilak 19] arantzatxoa atera ahal izan dute.
Argazkia: Eraman Jai Alai. Segurtasunaren eta fidagarritasunaren binomioa osatzen dute Maite Ortiz de Mendibil eta Maialen Aldazabalek. Emakumezkoen Jai Alai Ligaren estreinako txapelketan, Berriatuko Master Seriesean, ez zuten parte hartu andetxarrak eta berriatuarrak, baina, edozelan ere, atzo [urtarrilak 20] sasoi puntu eztian daudela sobera frogatu zuten, San Sebastian egunez, Azpeitiko Winter Series Desafioan. Bi setetan garaitu zituzten Helena Barrenetxea durangarra eta Frida Watkins zumaiarra.
Bikote gaztea izanagatik ere, lehiakor azaldu ziren Barrenetxea eta Watkins. Durangar aurrelariak erremateetarako duen abilezia aparta kantxaratu zuen beste behin, baina ez zen nahikoa izan bere lehiakide andetxarraren dominantziaren aurrean. Ortiz de Mendibilek, gainera, Aldazabalen babesa eduki zuen atzealdeko koadroetan. Berriatuarrak solidotasun itzela plazaratu zuen, eta ederto olioztaturiko makineria osatu zuen bere bikotekidearekin. Lau puntistek freskotasunez jokatu zuten, bizi, aipatutako lehen Master Seriesean lehiaketa minuturik eduki ez arren. Lehendabiziko setean, 12 eta 15 nagusitu ziren Ortiz de Mendibil eta Aldazabal.
Bigarren setak lehenengoaren dinamikak jarraitu zituen. Arabarrak aurrealdean ez zuen inongo pitzadurarik bistaratu, ezta bere atzelariak ere. Hori bai, tantoak egiteko trebetasunak erresistentzia handia topatu zuen Barrenetxearen eta Watkinsen aldetik. Azkenean, hamaulan berdintzera iritsi ziren, eta azken txanpa hartan egoera gaitzak modurik eraginkorrenean konpontzeko trebezia erakutsi zuten: 14 eta 15, Ortiz de Mendibilen eta Aldazabalen alde.
Argazkia: Eraman Jai Alai.
Emakumezkoen neurketaren bigarren seta estua izan baldin bazen, gizonezkoen norgehiagoka are borrokatuagoa izan zen. Maila handiko bikote biren arteko talka izan zen Izarraitz pilotalekuak hartu zuena: alde batetik, astelehenean [urtarrilak 19] Jai Alain porrot polemikoa eta gogorra jasota zetozen Eñaut Urreisti mutrikuarra eta Imanol Lopez zumaiarra; bestetik, sentsazio baikorrak berreskuratzen ari den Aritz Erkiaga ispastertarra eta Eusko Label Winter Seriesen garaipena lortzeko hautagaietako bat den Unai Lekerika gernika-lumotarra.
Urreisti eta Lopez bezperako errebantxa gosez atera ziren lehen istantetik, baita bigarren egunez jarraian goi mailan jokatzeak beregain duen eskakizun fisikoarekin ere. Lehiaketa ofizialak dakarren tentsiorik ez zuten topatu Azpeitian, baina bai, ostera, izen handiko aurkaritza. Gipuzkoar bikotea oso nagusi izan zen lehen setean: 15 eta 11ko markagailu argiarekin gailendu ziren. Bigarrenean, egoera irauli zuten Erkiagak eta Lekerikak, 14 eta 15 doi-doi irabaziz. Berdinketa haustean, asteleheneko mamuak uxatu ahal izan zituzten Urreistik eta Lopezek, 5 eta 3koarekin garaipena patrikaratuz.
Argazkia: Eraman Jai Alai.
Winter Series Desafioa ekimenak Munitibarren edukiko du hurrengo geltokia, bariku honetan [urtarrilak 23]. San Bizente jaien aterkipean, udal pilotalekuak goi mailako partiduak hartuko ditu, 19:30etik hasita: Xabier Barandika gernika-lumotarrak eta Julen Del Rio gasteiztarrak Ekaitz Mendizabal Goixerri mutrikuarra eta Jon Bullet Zabala markina-xemeindarra edukiko dituzte aurrez aurre, lehenik eta behin; jarraian, Erkiagak eta Iñigo Unda gernika-lumotarrak Urreistiren eta Lekerikaren kontra neurtuko dituzte indarrak.
