Lea-Artibaiko Kubarako material bilketa arrakastatsua izan da eta jasotakoa laster bidaliko dute
Lekeitio, Ondarroa, Mutriku eta Markina-Xemeinen egindako elkartasun ekimenak parte hartze handia izan du, eta bildutako material guztia Euskadi-Cuba elkartearekin batera kudeatuko dute Kubara bidaltzeko.
Lea-Artibain Kubarako antolatutako material bilketa solidarioak harrera bikaina izan du asteburuan. Lekeitio, Ondarroa, Mutriku eta Markina-Xemein herrietan egindako ekimenak herritarren erantzun zabala jaso du, eta antolatzaileek oso balorazio positiboa egin dute jasotako elkartasunaren inguruan.
Azaldu dutenez, lau herrietan material ugari batu da, eta herritar askok bat egin dute Kubako herriari laguntzeko deialdiarekin. Antolatzaileen hitzetan, jendeak portaera bikaina izan du eta parte hartzea handia izan da bilketa puntu guztietan.
Ekimenaren sustatzaileek nabarmendu dute bildutako guztia batu eta sailkatu egingo dela orain, ondoren Euskadi-Cuba elkartearekin batera kudeatzeko. Material hori Euskal Herriko beste herri batzuetan jasotako laguntzarekin batera bidaliko da Kubara datozen asteetan.
Lea-Artibaiko bilketaren helburua Kuban bizi duten egoera ekonomiko eta sozial larriari erantzutea izan da, oinarrizko produktuen eskasia gero eta handiagoa den unean. Horregatik, antolatzaileek eskerrak eman dizkiete parte hartu duten herritar guztiei, eskualdeak berriro ere elkartasunerako duen gaitasuna erakutsi duelako.
Balorazioaren arabera, ekimenak berriz ere agerian utzi du Lea-Artibaiko herriek nazioarteko elkartasun deialdiei erantzuteko konpromiso handia dutela, eta Kubako herriarentzat laguntza zuzena izango den ekarpena egin dutela.
