Berriatuako San Gregorio txapelketak zesta punta giro ikusgarria utzi du
Final ikusgarriak eta zesta eskolako laguntzaileentzako omenaldia izan dira zapatuko hitzordu berezienak.
Berriatuko frontoiak zesta punta giro aparta bizi izan zuen zapatuan [maiatzak 16] San Gregorio txapelketako finalekin. Herriko zale ugari batu ziren harmailetan eta egun osoan zehar giro herrikoia eta beroa izan zen protagonista, frontoian ikusitako partidu ikusgarriekin batera.
Guztira zazpi kategoriatako finalak jokatu ziren, maila guztietako pilotariek euren maila erakutsiz. Kadeteetatik hasi eta Ohorezko Mailaraino, norgehiagoka estuak eta tanto ikusgarriak izan ziren Berriatuko frontoian, ikusleen txalo artean.
Eguneko unerik berezienetako bat, ordea, zesta eskolako laguntzaileei egindako omenaldi xume baina hunkigarria izan zen. Urteetan herriko harrobiarekin lanean aritu diren pertsonak omendu zituzten finalen aurretik, frontoiko publikoaren aitortza eta txalo zaparrada jasoz.
Kirol mailan, txapeldunak honako hauek izan ziren: Kadete Maila B kategorian Aitzol eta Arrizabalaga nagusitu ziren; Nesken Maila B-n Ane eta Joane izan ziren onenak; Kadete Maila A mailan Argoitia III.ak eta Bereau II.ak irabazi zuten; Nesken Maila A kategorian Erika eta Oaia gailendu ziren; Jubeniletan Txanton eta Silveti izan ziren txapeldunak; Nagusietan Martin eta Ontoria nagusitu ziren; eta Ohorezko Mailan Aaron eta Oierdik jantzi zuten txapela.
Final guztiak amaitu ostean egin zen sari banaketa, giro ederrean eta zaleen artean ospakizun kutsuarekin. Horrez gain, eguna borobiltzeko zozketa ere egin zen frontoian bertan.
San Gregorio txapelketako finalek berriro erakutsi zuten zesta puntak indar handia duela Berriatuan, bai harrobian bai herritarren artean, eta zapatuan bizi izandako giroak argi utzi zuen pilotak herrian duen sustraia bizirik dagoela.
