Euskal Zine Bilerak zabaldu du 49. edizioko lehiaketan izena emateko epea
Lekeitioko euskarazko zinema jaialdiak uztailaren 30era arte jasoko ditu Sail Ofizialeko film laburrak.
Euskal Zine Bilera jaialdiak zabaldu du 49. edizioko Sail Ofizialeko Lehiaketan izena emateko epea. Euskaraz egiten den zinema jaialdirik zaharrenak aurten ere euskal ikus-entzunezkoen sorkuntza sustatzea izango du helburu, eta lanak aurkezteko aukera uztailaren 30era arte egongo da zabalik.
Lekeition ospatzen den jaialdiak euskaraz sortutako film laburrak eta ikus-entzunezko proiektuak bilduko ditu aurten ere. Antolakuntzak azaldu duenez, zine berria egin eta istorio berriak kontatu nahi dituzten sortzaileei ateak irekitzea da ekimenaren xede nagusietako bat.
Aurkeztutako lan guztien artean aurre-aukeraketa egingo da, eta handik 20 film labur aukeratuko dituzte Sail Ofizialeko Lehiaketa osatzeko. Proiekzioak urrian egingo dira Lekeitioko Ikusgarri zinema aretoan.
Lehiaketak hainbat sari banatuko ditu aurten ere. Film Onenaren sariak 3.000 euroko ordainsaria izango du, eta Zuzendaritza Onenaren eta Gidoi Onenaren sariek 1.600 euro bana jasoko dute. Horrez gain, Ikusleen Saria, Adineko Epaimahaiaren Saria eta Benito Ansola Gazte Epaimahaiaren Saria ere emango dira.
Jaialdiak nabarmendu du ikusleek eta herritarrek protagonismo berezia izango dutela edizio honetan ere, ikusleen botoek eta epaimahai bereziek hainbat sari erabakiko baitituzte.
Lehiaketaren oinarriak eta izena emateko informazio guztia Euskal Zine Bilera webgunean daude eskuragarri.
