Lekeitioko arrantzale bat hil da Senegalgo uretan
Bermeoko Atunsa enpresan egiten zuen lan Senegalgo uretan hil den langileak.
Lekeitioko arrantzale bat (A.A.C) hil da Senegalgo uretan. LAB sindikatuak adierazi duenez, Bermeoko Atunsa enpresan egiten zuen lan 45 urteko arrantzaleak. Heriotza ez traumatiko bezala izendatu dute lan heriotza, eta sindikatutik jakinarazi dute, aurten enpresa horretan heriotza ez traumatikoz hildako bigarren langilea dela.
LAB sindikatuaren zenbaketaren arabera aurten, gutxienez, 33 langilek galdu dute bizitza lanean: “Ezer baino lehen, LAB sindikatuak bere elkartasuna eta samina adierazi nahi dizkie hildako langilearen senide, lagun eta lankideei”.
Sindikatuak salatu duenez, horrelako istripuak aztertu eta argitzeko “ikaragarrizko trabak eta gardentasun eza” izaten dira nagusi. Gainera, heriotza ez traumatikoen atzean lan karga, erritmoak, estresa eta jarduera mota honetan presente dauden faktoreek eragin zuzena dutela azpimarratu du. “LABetik irmo salatu nahi dugu heriotza hau. Izan ere, arrantza sektorean izaten diren eskubide urraketek erabateko eragina izan ohi dute heriotza mota hauetan: hitzarmen duinen faltan, segurtasun neurririk eza, etenik gabeko jardunaldiak, arrantzaren beraren lan neurri gogor eta arautu gabeak…”.
Nabarmendu dute arrantza politikek ere “eragin zuzena” daukatela lan baldintzetan: “Jakina da hemengo enpresak direla beste lurralde batzuetako itsasoak ustiatzen dituztenak hemengo agintarien laguntzarekin, eta Eusko Jaurlaritzak apustu neurrigabea egiten duela atunontziak eta altura handiko flota kudeatzen duten enpresei laguntza eskaintzeko, bestelako arrantza motak, hala nola baxurako arrantza, askoz ere jasangarriagoak eta hurbilagoak direnak, gutxietsiz eta plan estrategiko baten beharrean itoz”. LABetik azpimarratu dute arrantza sektore guztiak behar duela lan baldintzen aldaketa eta arautze legala: “Duela 500 urteko araudiekin eta ohiturekin lanean aritzea ez da zilegi, eta lan baldintzak arautzeak eragina izango luke istripuen eta heriotzen tasan”.
Horregatik, LABek laneko osasun baldintza egokiak bermatu ditzaten “exijitu” die enpresei. Era berean, Eusko Jaurlaritzari ereduaren inguruko norabide aldaketa egin dezan eta laneko osasuna bete dadin berma dezan eskatu dio sindikatuak.
