Bizkaibusek autobus zerbitzua indartuko du Lea-Artibain
Bizkaiko Foru Aldundiak bizkaibus zerbitzua indartuko du Lea-Artibain, "lurralde kohesioa indartu eta landa eremuen isolamenduari aurre egiteko".
Bizkaiko Foru Aldundiak Bizkaibuseko lineak indartuko ditu Lea-Artibain, batez ere, azken orduko eta goizeko zerbitzuak zabalduko ditu eta ospitale zein ikastetxeetako sarbidea hobetuko du. Gainera, landa eremurako zerbitzu malguago eta egokituago baterantz aurrera egiteko pausoak eman dituztela zehaztu dute.
Azaldu dutenez, neurriak Lea-Artibaiko garraio publikoa pixkanaka hobetzeko estrategia zabalaga baten parte dira, eta 2026ko ekainaren 1etik aurrera ezarriko dira; hala ere, 2027 hasierara ere luzatuko dira.
Lea-Artibai eskualdearen kasuan, Bizkaibusek A3512, A3513 eta A3523 lineetako hainbat zerbitzu indartuko ditu, arratsaldeko azken orduko konexioak eta goizeko lehen ordukoak hobetuz. Hala, Bilbotik 21:05ean irteten den eta gaur egun Gernika-Lumon amaitzen den azken zerbitzua Lekeitiora arte luzatzea da aurreikusten den aldaketetako bat, eta baita ere Gernika-Lumo eta Lekeitio artean zerbitzu gehiago jartzea goizeko eta gaueko ordutegietan, urteko egun guztietan. Gainera, Gernika-Lumotik Lekeitiora joateko beste zerbitzu bat jarriko dute 07:05ean. Horrez gain, A3523 linearen goizeko lehen orduko zerbitzua jaiegunetan ere zabalduko da. Orain arte, Gernika-Lumotik Lekeitiora jai egunetan zegoen lehenengo autobusa (A3523 linea) 08:05ean ateratzen zen, eta aurreikusitako aldaketagaz, zerbitzua bi ordu lehenagora aurreratuko da.
Bestalde, A3512 lineak zerbitzu berri bat izango du. Bilbotik aterako den azken zerbitzua 21:45ean izango da; horrek, autobidetik egiten den azken orduko zerbitzua ordubetez luzatuko du. Izan ere, gaur egun, Bilbotik Lekeitiorako azken irteera 20:45ean dago. “Hobekuntza horiei esker, eskualdeko mugikortasun aukerak zabalduko dira eta haiegunetan erabilgarri dauden lehen zerbitzuak nabarmen aurreratuko dira, itxaronaldiak murriztuz eta barne konektibitatea hobetuz”.
Bizkaiko Foru Aldundia Lekeitio, eta Gernika-Lumo eta Usansolo-Galdakaoko ospitaleetara joateko linea zuzen berri bat sortzeko lanean dabil: “Ospitaleetarako sarbidea hobetzeko, eta gaur egun baino zerbitzu azkarragoa eskaintzeko”. Aldi berean, landa eremuetara bideratuta egongo den linea berri batean lanean dabiltzala azpimarratu dute. Zerbitzu berriak Lekeitio eta Markina-Xemein inguruko landaguneak eta udalerriak lotuko ditu, eguneroko mugikortasun beharretara hobeto egokitutako ordutegiekin eta maiztasun handiagoarekin.
2026ko irailetik aurrera, Bizkaiko Foru Aldundiak Ondarroa eta Markina-Xemein arteko konexioa hobetzea aurreikusten du, Bizkaibus zerbitzuak “pixkanaka” indartuz; bereziki, enpleguari lotutako mugikortasuna hobetzeko helburuagaz.
Gainera, aipatutako aldaketez gain, autobidezko A3916 linean (Bilbo-Ermua-Bilbo) ere aldaketak egingo dira. Markina-Xemein eta Ondarroa arteko joan-etorriak handituko dira, batez ere, industrialdeetara eta lantokietara eguneko lehen orduetatik sartzea errazteko. Proposamenak aurreikusten duena da, egungo zerbitzuaren hasiera aurreratzea, eta horrela, eskualdeko barne konektibitatea indartzea. Era berean, bide horretatik jarraituz, asteburuetako konexioak hobetzea ere aurreikusten dute, batez ere, goizean zerbitzu gehiago jarriz. Gainera, osagarri gisa, arratsaldeko ordutegian Bilbo eta Ondarroa artean zuzeneko zerbitzu berri bat gehitzea aztertuko dute, A3915 linean, “bi eremuen arteko laneko eta eguneroko joan etorrietarako alternatiba lehiakorrago eta erosoago bat eskaintzeko helburuarekin”.
Azkenik, Lea-Artibaiko landa eremuetarako garraio eredu berria ezartzea aurreikusten dute, minibus estilokoa. Hala, tokiko errepideetarako egokiagoak izango dira, eta egungo egoerarekin alderatuta, zerbitzuaren ordutegiak “nabarmen” handituko direla azaldu dute. Landa eremuan bizi diren biztanleen egunerokotasuna hobetzeko helburuagaz, asteko zazpi egunetan ordutegi zabalagoak eta maiztasun erregularragoak izango dituen sistema baterantz bidea egitea aurreikusten dute; bereziki enpleguari, osasun arretari, hezkuntzari eta oinarrizko zerbitzuetarako sarbideari erreparatuta.
Barne konektibitatea hobetzeaz gain, ekimenaren helburua lurralde kohesioa indartzea eta landa eremuen isolamenduari aurre egitea dela zehaztu dute Bizkaiko Foru Aldunditik, “garraio publikorako sarbide orekatuagoa bermatuz eta mugikortasun eskaintza geografikoki eta biztanleriari dagokionez sakabanatuta dagoen eskualde baten ezaugarri espezifikoetara egokituz”.
