Erromeri Eguna ospatuko dute zapatuan dantza, musika eta giro herrikoiarekin
Gure Ametsa Dantza Taldeak antolatuta, kalez kale dantzak, bazkaria eta Larrain dantza izango dira egun osoko egitarauan.
Mutrikuk Erromeri Eguna ospatuko du zapatuan [maiatzak 30], euskal dantza eta erromeria giroa protagonista izango dituen egun berezi batekin. Gure Ametsa Dantza Taldeak antolatu du ekimena, Mutrikuko Udalaren, txistulari taldearen eta akordeoi taldearen laguntzarekin.
Antolatzaileek azaldu dutenez, urtero egiten duten ospakizuna da Erromeri Eguna, eta helburua da herritarrak euskal dantzen inguruan elkartzea eta giro herrikoia sustatzea. Aurtengo egitaraua 12:00etan hasiko da, Beheko Plazan egingo duten elkartzearekin. Handik aurrera, parte hartzaileak kalez kale ibiliko dira dantzan herriko hainbat gunetan zehar.
Goiko Plazan eta Beheko Plazan egingo dituzte geldialdiak, eta bertan arin-arina, fandangoa eta jauziak bezalako euskal dantzak eskainiko dituzte. Eguerdiko ekitaldien ostean, 15:00etan bazkaria egingo dute Egañaneko frontoian. Antolatzaileek adierazi dutenez, dagoeneko 90 lagun inguruk eman dute izena bazkarirako.
Arratsaldean, 18:00etan, Kittu taldea ariko da kalez kale giroa alaitzen. Ondoren, 20:00etan, Larrain dantza egingo dute Beheko Plazan, eta gauean musikarekin amaituko dute eguna.
Gure Ametsa Dantza Taldeak herritarren parte hartzea sustatzeko hainbat entsegu ireki antolatu ditu azken hilabeteetan. Otsail amaieran hasi ziren hasiberrientzako saioekin, eta apiriletik aurrera errepaso entseguak egin dituzte. Antolatzaileek nabarmendu dute edozein herritarrek izan duela parte hartzeko aukera, euskal dantzak ikasi eta Erromeri Egunean dantzan aritzeko.
“Espero dugu jendeak ondo pasatzea eta ikasitakoa erakusteko aukera izatea”, azaldu dute antolatzaileek. Era berean, eguraldiak laguntzea espero dute, egun osoan zehar giro ederra sortzeko.
Parte hartzaileei dagokienez, antolatzaileek azaldu dute ohikoa dela baserritar jantzita joatea, eta herritarrak ere animatu dituzte euskal jantziekin parte hartzera.
