200 ikasle baino gehiago batu ditu Markina-Xemeingo Zientzia eta Teknologia Egunak
Atxondo kiroldegian egin dute Lea-Artibaiko LH6ko ikasleentzako zientzia, teknologia eta industria mundua gertutik ezagutzeko jardunaldia.
Markina-Xemeingo Atxondo kiroldegian ospatu dute gaur [maiatzak 29] Zientzia eta Teknologia Eguna, eta bertan batu dira Lea-Artibaiko 200 ikasle baino gehiago. Eskualdeko Lehen Hezkuntzako seigarren mailako ikasleek zientzia, teknologia, ingeniaritza eta matematikekin lotutako esperientzia praktikoak ezagutzeko aukera izan dute goiz osoan zehar.
Lea-Artibaiko Kooperatiben Mahaia Elkarteak eta Leartibai Fundazioak antolatutako ekimenak eskualdeko enpresak, EHUko hainbat sail eta ikerketa zentro bildu ditu espazio berean. Parte hartu dute, besteak beste, Fagorrek, Burdinolak, Ikautxok, Leartikerrek, Azti-k, Neikerrek eta EHUko Medikuntza, Telekomunikazio eta Material Polimerikoen arloko sailek.
Atxondo kiroldegia hamaika txokotan banatu dute, eta ikasleak taldeka ibili dira goizean zehar txokoz txoko. 20 minuturo txandakatuz, robotika, programazioa, telekomunikazioak, errealitate birtuala, laborategiko muntaketak edo material ezberdinekin egindako esperimentuak probatu ahal izan dituzte.
Antolatzaileek azaldu dutenez, jardunaldiaren helburua da ikasleek eskolan ikasten dituzten edukiak benetako aplikazioekin lotzea eta eskualdeko enpresek egiten duten lana gertutik erakustea. Horregatik, jarduera gehienek izaera manipulatiboa eta praktikoa izan dute, haurrek eurek probatu, ukitu eta ulertzeko modukoak.
“Euren adinera egokitutako azalpenak ematen saiatzen gara, eta batez ere eurek gauzak egitea nahi dugu”, nabarmendu dute antolakuntzatik. Ikasleen erantzuna oso ona izan dela ere azpimarratu dute, parte-hartzea eta interesa handiak izan direlako txoko guztietan.
Zientzia eta Teknologia Eguna TALENTATU proiektuaren barruan kokatzen da. Lea-Artibaiko Kooperatiben Mahaia Elkarteak eta Leartibai Fundazioak 2018-2019 ikasturtean abiatu zuten egitasmoa eskualdeko ikastetxeekin batera, ZTIM arloko ikasketak sustatzeko eta gazteei bertako industria sarearen errealitatea erakusteko.
Proiektuaren helburu nagusietakoa da eskualdeko talentua bertan mantentzea eta etorkizunean Lea-Artibaiko enpresek behar izango dituzten profil profesionalak bertako gazteen artean sustatzea. Horretarako, hezkuntza eta enpresen arteko harremana indartu nahi dute, ikasleek eskualdearekin eta bertako lan aukerekin lotura estuagoa izan dezaten.
