Uni pilotalekua beteko du Markina-Xemeingo Grand Slamak
Ekainaren 14tik uztailaren 16ra arte jokatuko dute Liga profesionaleko gorengo mailako txapelketa. Sarrerak eta bonoak salgai daude jada.
Zesta-punta denboraldian bete-betean sartuta dago Markina-Xemein. Uni udal pilotalekuak Grand Slamaren hasiera hartuko du domekan [ekainak 14], eta bertan jokatuko dituzte astero txapelketako jardunaldiak, Karmen Egunean jokatuko den final handira arte.
“Luxuzko kartel ezin hobea” aurkeztu dute gaur puntistek pilotaren unibertsitatean. Ligako lider den Eñaut Urreisti B multzoan ariko da Grand Slameko lehian. Gorka Solozabal atzelaria izango du lagun mutrikuarrak, eta etxeko Alex Goitiandia izango du aurkari. Iron Cup-a irabazi berri du Goitiak, eta oraingoan, Thibaut Basque izango du atzelari lanetan. Multzo honetan, Johan Solozabal eta Jon Zabalak osatuko dute hirugarren eta azken bikotea.
A multzoan ariko da “zesta-puntaren erregea”. Aritz Erkiaga ispastertarrak Gorka Mugartegi “Atain” markina-xemeindarra izango du lagun, eta urrian Durangon elkarrekin lortutako txapela berriz jazteko asmoagaz datoz biak. Frontoi gaitza dela, baina “ondo ezagutzen” duela adierazi du etxeko puntistak, hala, pozik agertu da “familia eta lagunen aurrean” jokatu ahal izateagaz. Bost hilabeteren ostean, Mungiako Grand Slameko aurkezpenean berragertu zen atzo Xabier Barandika. Hala, kantxara itzuliko da gernikarra, eta Winter Seriesa bi bider irabazi duen Ion Ibarluzea izango du lagun.
Puntista markina-xemeindarrak Grand Slameko aurkezpenean
Hala, bikote bakarra geratuko da kartela osatzeko: A multzoan, Ekiaga-Atain, Barandika-Ibarluzea eta sailkapen faseko irabazleak. B multzoan, Urreisti-Gorka, Goitia-Basque eta Johan-Zabala.
Barikuan [ekainak 12] ezagutuko dute zaleek sailkapen fasea irabazi eta A multzoa osatuko duen bikotea. Aurre-kanporaketa fasean bi bikote iritsi dira finalera: Alde batetik, Javier Urrutia eta Ortzi Aldazabal “Argoitia” berriatuarra, promesa mailan ari diren gazteak. Bestetik, Julen Basterra “Txanika” eta Eñaut Salegi atzelari markina-xemeindarra. Ostiralean ariko dira aurrez aurre, eta egungo zestalari onenekin jokatzeko aukera izango dute irabazleek.
Emakumeen Master Seriesa. Uztailaren 3an hasiko da Emakumeen Master Seriesa, gizonezkoen laugarren jardunaldiarekin batera. Bi final erdi eta Karmen Eguneko finala jokatuko dituzte uztailaren 3an, 10etan eta 16an, eta lehen aldiz, Ligarako puntuagarria izango da. Lau markinar izango dira lehian: Erika Mugartegi, Lur eta Arai Lejardi eta Alize Arriaga. Etxeko frontoia ezagutzen duen puntista da Lur Lejardi, eta “pozik” agertu da Arriagagaz jokatzeagaz. Hala, “dena emateko” garaia dela aitortu du. Uztailaren 3an egingo den lehen jardunaldian Erikak eta Fridak Elaia eta Arairen aurka jokatuko dute, eta uztailaren 10ean, Lurrek eta Alizek Helena eta Maia izango dituzte aurrez aurre. Bi bikote onenek Karmen Eguneko finala jokatuko dute.
Markina-Xemeingo Grand Slameko egutegia:
- Ekainak 14, domeka. 17:00etan.
(A) Erkiaga-Atain/Barandika-Ibarluzea
(B) Goitia-Basque/Urreisti-Gorka - Ekainak 19, barikua. 19:00etan.
(A) (Javier-Argoitia/Txanika-Salegi) / 1. jardunaldiko irabazlea
(B) Johan-Zabala/ 1. jardunaldiko irabazlea - Ekainak 26, barikua. 19:00etan.
(A) (Javier-Argoitia/Txanika-Salegi) / 1. jarduanldiko galtzailea
(B) Johan-Zabala/1. jardunaldiko galtzailea - Uztailak 3, barikua. 19:00etan.
Erika-Frida/Elaia-Arai
Gizonezkoen 1. finalerdia - Uztailak 10, barikua. 19:00etan.
Lur-Alize/Helena-Maia
Gizonezkoen 2. finalerdia - Uztailak 16, eguena. 18:00etan.
Finalak
