Alazne Solabarrieta desagertu da Venezuelako lurrikaretan, Jose Maria Solabarrieta Ondarroako alkate ohiaren biloba
Momentuz, 164 hildako eta 971 zauritu egon dira Venezuelan izandako bi lurrikaretan. Hala ere, biktima askoz gehiago egongo direla iragarri dute, datuetan La Guaira ingurua oraindik ez baitute kontuan hartu.
Delcy Rodriguez Venezuelako presidenteak jakitera eman dutenez, gutxienez 164 pertsona hil dira eta 971 baino gehiago zauritu Venezuelan bart — Euskal Herrian gauerdia zenean, Venezuelako 18:00etan — izandako lurrikara bikoitzaren ondorioz. Richter eskalari dagokionez, 7,2 eta 7,5 graduko lurrikarak izan dira, eta ohartarazi dute, aipatutako zifrek ez dutela barnebiltzen La Guaira estatuko biktima kopurua; izan ere, bertan jo dute gogorren lurrikarek. Desagertuen artean, Alazne Solabarrieta dago. Antza denez, Solabarrieta zegoen eraikina egoera “oso txarrean” zegoen eta behera etorri da; erreskate taldeak bere bila ari dira. Bere bikotekidea zaurituta dago, baina etxetik irteteko aukera eduki du.
Solabarrieta Caracasen jaio zen, baina jatorri ondarrutarra dauka. Jose Maria Solabarrietaren biloba da. Azken hori Ondarroako alkatea izan zen Bigarren Errepublikan eta Venezuelan erbesteratua 36ko gerraren ostean. Eusko Jaurlaritzako Uren zuzendari ohia eta Bizkaiko Lurralde Ekintzako eta Ingurumeneko foru diputatu ohi María Esther Solabarrietaren lehengusina da.
