Urpeko arrantza egiten ari zen gizon baten gorpua aurkitu dute Ondarroan
57 urteko gizona atzo [uztailak 12] eguerdian Ondarroako portura joana zen urpeko arrantza egitera. Gaur [uztailak 13] 10:15 aldera agenteek uretan murgilduta aurkitu dute desagertuaren gorpua.
Ondarroan urpeko arrantzan ari zen gizon baten gorpua aurkitu dute gaur [uztailak 13] Ertzaintzako Uretako Ataleko agenteek. Ertzaintzak jakitera eman duenez, 57 urteko gizona atzo [uztailak 12] eguerdian Ondarroako portura joana zen urpeko arrantza egitera. Urpekaria bilatzeko dispositiboa bart gauean jarri zen abian, senide batek Larrialdi Zerbitzuari egindako deiaren ostean.
Hala, Ondarroako Ertzain etxeko patruilez gain, Gurutze Gorria ere Ondarroako kaian aritu da lanean. Bertan, desagertutako gizonaren arropa, hainbat gauza zituen orgatxo bat eta uretan buia bat aurkitu dituzte. Ertzaintzako Erreskate Unitateko urpekariak, droneak, helikopteroak nahiz bestelako hainbat baliabide erabili dituzte gorpua aurkitzeko, eta gaur 10:15 aldera agenteek uretan murgilduta aurkitu dute desagertuaren gorpua.
Bertaratu den medikuak heriotza ziurtatu du, eta epailearen baimenagaz, gorpua Auzitegi Medikuntzako Euskal Institutura eroango dute.
