Malen jaietan ere, elkartasunak ez du etenik
Malen jaiak bete-betean ospatzen dabiltza mutrikuarrak. Gaurkoan Elkartasun Egunean eta Malen Txiki Egunean murgildu dira.
Malen jaietako azkenengo txanpan sartzen ari dira mutrikuarrak. Gaurkoan [uztailak 23] Elkartasun Eguna zein Malen Txiki Eguna ospatzen dabiltza jai giro ederrean. Alde batetik, txikienek Goiko Plaza bete dute, eta beste aldetik, Beheko Plazan batu dira 80 herritar inguru, euskal preso, iheslari eta deportatu politikoen aldeko bazkarian.
Umeen marrazki lehiaketarekin hasi dute eguna, eta gero, Erraldoi eta Buruhandien konpartsak eta Txistu taldeak kalejira osatu dute, Beheko Plazatik Goikora arteko bidea eginez. Bertan, marrazki lehiaketako sariak banatu dituzte. Bi kategoriatan banatu dituzte sariak: 2014tik 2017ra bitartean jaiotakoak, eta 2018tik aurrera jaiotakoak. Kategoria bakoitzean bi sari banatu dituzte. Txikienetan Irati Ituartek irabazi du, eta Elene Urreistik lortu du bigarren saria. Nagusienetan, berriz, Iurgi Lean izan da irabazlea, eta Ixua Gonzalezek lortu du bigarren saria.
Ondoren, Mutriku Sokatira taldearen eskutik herri kirolak egon dira plazan, eta bertan ibili dira ume guztiak, alde batetik bestera jolasean.
Elkartasuna eten gabe. Eguerdian Zubixan batu dira herritarrak, euskal preso, iheslari eta deportatuen aldeko brindisa egiteko. Ondoren, txosnagunerantz egin dute, eta bertan ekitaldia eskaini die falta direnei. 2027ko urtarrilaren 9ko manifestazioko deia eginez eman diote amaiera ekitaldiari, euskal preso, iheslari eta deportatu politikoen aldeko oihua eginez. Gero, bazkaltzen jarri dira guztiak, eta bazkalostean Elene eta Anukeren kantaldiaz gozatu dute.
Bestalde, 17:00etan, txikien Madalen txapelketako finalak jokatuko dira Miruaitz frontoian, eta ordu berean, Zabiel plazan, Modernoak ikuskizuna egongo da, Zirika Zirkus konpainiaren eskutik. Gainera, gaur iluntzean umeen danborrada egongo da, Hogar del Marinero elkarteak antolatuta.
Bizixo Jai Konpartsak ere egitarauagaz jarraituko du. Eguerdiko bazkaria eta kantaldiaren ondoren, Ondoezik elektrotxaranga ibiliko da kalez kale, eta 23:30ean Playback txapelketa eta jolasak izango dituzte txosnagunean.
Bihar, Kuadrilla Eguna. Biharko eguna ere “berezia” da herritarrentzat. Goizean goizetik kalera atera, eta koloretako alkandora jantzita betetzen dute Goiko Plaza. Gainera, eguerdian, kuadrillen arteko bazkarian batuko dira txosgunean, Bizixo Jai Konpartsak antolatuta. Horrez gain, Santixo Egunean [uztailak 25] egongo da zertaz gozatu Gipuzkoako kostaldeko herrian. Gainera, goizetik gauera arteko egitaraua prestatu dute herritarrek, egunari bestelako kolore bat emateko asmoz.
