Balkoiak eta leihoak apaintzeko lehiaketa egingo dute Mutrikun
Ekainaren 14ra arte izena eman ahal da, turismo bulegoan edo Furgobaratzan, edo posta elektronikoa idatzita. Eskualde mailako sari bat eta herri mailako bi sari banatuko dituzte.
Debegesa Debabarreneko garapen agentziak eta Mutrikuko Udalak antolatuta, balkoiak eta leihoak apaintzeko lehiaketa egingo dute lehen aldiz Mutrikun. Herritarrek ekainaren 14ra arte izena eman ahal dute, turismo bulegoan edo Furgobaratzan, edo posta elektronikoa bidalita (turismo@mutriku.net).
Herritarren parte hartzearekin, herriko “ingurumen kalitatea eta itxura hobetu” nahi ditu udalak, landareei eta loreei garrantzia emateaz gain. “Herrigune atseginagoa eta ederragoa ere lortuko da, eta, bide batez, herritarren artean landareak zaintzeko ohitura sustatuko da”.
Guztira hiru sari banatuko dituzte: eskualde mailako bat eta herri mailako bi. Eskualde mailako saria 250 euroko erosketa bonua izango da, eta herri mailakoak 200 euroko eta 150 euroko bonuak. “Bonuak Bertan merkatari elkarteko kide diren saltokietan erabili ahal izango dira”.
Lehiaketaren inguruko informazio gehiago jaso nahi dutenek telefonoz deitu (943-60 32 44 –10:00etatik 14:00etara–) edo posta elektronikoa idatzi ahal dute (turismo@mutriku.net).
