Artibaiko Beteranoek denboraldi amaierako irteera egingo dute Peñafielera
Zapatuan jokatuko dute partidua Atletico Peñafiel taldearen kontra. Urtero modura, kirola eta aisialdia uztartuko dituzte.
Artibaiko Beteranoak eta Atletico Peñafiel Markina-Xemeinen jokatutako partiduan. Argazkia: Artibai Beteranoak Urtero modura, Artibai Futbol Taldeko beteranoek irteera bategaz emango diote amaiera denboraldiari. Aurten Peñafielera (Valladolid, Espainia) abiatuko dira Atletico Peñafiel beteranoen taldearen kontrako lagunarteko partidua jokatzera.
Elkartrukea egiten dute urtero Artibaiko Beteranoek beste herri batzuetako taldeekin, futbolean jokatzeagaz gain, beste talde batzuk ezagutu, elkarrekin jokatu eta giro ona eta esperientziak partekatu asmoz. Asmo horregaz, maiatzaren 12an Markina-Xemeinen egon ziren Atletico Peñafiel taldeko beteranoak, eta orain, Artibaikoak hartuko dituzte euren etxean.
Zapatu goizean [ekainak 8] joango dira Markina-Xemeingo futbolariak Peñafielerantz. Goizean herria ezagutzeko asmoa daukate eta arratsaldean jokatuko dute partidua, 19:00etan hain zuzen. Partiduaren ostean ere elkarrekin afaltzea daukate aurreikusita, eta biharamunean itzuliko dira etxerantz.
Peñafiel taldekoak Markina-Xemeinen egon zirenean ere herria ezagutu eta Artibaikoekin bazkaltzeko aukera eduki zuten, beti bezala, kirola eta aisialdia bat eginda. Artibaiko Beteranoek hamargarren irteera izango dute aurtengoa.