Irteera bateratua edukiko dute Ziortza-Bolibar, Etxebarria, Berriatua eta Markina-Xemeingo jubilatuek
Zapatuan egingo dute ibilaldia Markina-Xemein inguruetan. 10:30ean jarri dute ordua batzeko.
Ziortza-Bolibar, Berriatua, Etxebarria eta Markina-Xemeingo jubilatuek ibilaldi bateratua edukiko dute zapatuan [ekainak 8]. Urtero bi ekitaldi egiten dituzte batera: herriarteko topaketak bazkariagaz eta ibilaldi bateratua. Aurtengo ibilaldiaren antolatzailea Markina-Xemeingo Beti Jai elkartea izango da.
Parte hartzeko aukera zabala izateko bi ibilbide izango dituzte aukeran. Azaldu dutenez, batak ordu bete inguruko iraupena izango du, eta besteak ordu eta erdi ingurukoa. 10:30ean jarri dute ordua batzeko Beti Jai elkartearen egoitzaren aurrean, hortik denak batera abiatuko dira ibilbidea egitera.
Ibilbide bera egingo dute denek, baina luzekoak aurrerago jarraituko dute Markina-Xemeingo erdigunera itzuli aurretik. Horrela, San Agustin kaletik Barroeta futbol zelairantz joango dira Arretxinagatik igarota. Ibilaldi motzekoak Beko Benta kaletik Zelairantz itzuliko dira, ostera, luzea aukeratzen dutenek Suhiltzaileetara joan eta Lesandik buelta emango dute Zelairantz abiatzeko.
Ibilbidea amaitutakoan, guztiek batera mokadutxoa hartuko dute Beti Jai elkartean.