Kendu dute uretara eroritako Ondarroako Plaiko Zubiaren zatia
Martitzenean jausi zitzaien zubi zatia uretara, uste baino pisu gehiago zuelako eta garabiak ezin izan zuelako altxatu. Ordutik eskegita egon da; zati bat zegoen urpean.
Astelehenean [ekainak 3] hasi ziren Ondarroako Plaiko Zubia desmuntatzen. Hurrengo egunean, martitzenean, erreka ondoko bigarren zatia erretiratzen ari zirela, uretara erori zitzaien. HITZAk jakin ahal izan duenez, 14:00ak aldera kendu dute jausitako zubi zatia.
Jausi zenean lekukoek esan zutenez, erorketak zarata handia atera zuen. “Langile bati 22.000 kiloko pieza igotzeko prest zegoela entzun diogu, eta jarraian, igo nahian zebiltzan zubi zatia erori egin da”. Udal ordezkariek agertu zutenez, antza denez, igo beharreko pisua uste baino handiagoa zen, eta garabiak ezin izan zuen gehigizko pisua altxatu. “Pisua txarto kalkulatu zuten. Garrantzitsuena da langileek ez zutela minik hartu”.
Egunotan egin beharko dituzten lanak direla eta, Ondarroako Udalak hainbat aldaketen berri eman nahi izan die herritarrei. Barikura [ekainak 5-6-7] bitartean, garabia Alamedako gunean dago, zubiaren beste aldeko zati biak ateratzeko. Horregatik dago hesituta Alameda, eta obragaz arduratuko diren ibilgailuen sartu-irtena segurtasunez bermatu ahal izateko, Alamedako eta Itsasaurreko tabernen terrazak kendu behar izan dituzte. “Gogoratu: obra eremura ezin daiteke sartu, eta obra arduradunen jarraibideak errespetatu”.
Zubia itxita dago 2016ko abuztuaz geroztik, eta lanak bederatzi hilabeteko epean amaitzeko asmoa agertu dute Bizkaiko Foru Aldundiko Ekonomi eta Lurralde Garapena Sustatzeko Saileko arduradunek. Birgaitze lanei esker, zubiak biratzeko gaitasuna berreskuratuko du. Artisau eran konponduko dute zubia, metodo tradizionala erabilita, zubia eraikitako garaian egin modura.