Frontoiko obraren bigarren fasea lantzen eta skate parkerako proiektua prestatzen hasi direla jakinarazi dute.
Hauteskunde programan aurkeztutako proiektuak lantzen hasi dela jakinarazi du Etxebarriko Udalak. Izan ere, hamar puntuak hemendik lau urtera beteta egotea dute helburu. Bide horretan, frontoiko obraren bigarren faseko obra egiteko prozesua prestatzen ari direla azaldu du Jesus Iriondo alkateak, “obra esleitu ahal izateko”. Bigarren fasean probalekuko lurzorua estali eta kontrakantxa jarriko dute, frontoiari erabilgarritasun handiagoa emateko.
Bestalde, Galartzan skate parkea jartzeko lanak ere baditu udalak esku artean. Lanok irailean edo urrian hasteko asmoa daukate. Alkateak azaldu duenez, komunak dauden ondoko landan kokatuko da skate parkea, aurretik dagoen gimnasioari batuz. “Aurten parkea egingo dugu, baina aurrerago beste ekipamendu batzuk ere jarriko ditugu”. Izan ere, Galartzan aisialdi eta kirol gune osotu bat prestatzea dute helmuga. “Plangintza bat egingo dugu eta forma ematen joango gara parkeari”.
Aurtengo baserri bideen hobekuntzekin amaitzen ari direla ere zehaztu du Iriondok. “Eskutuzuloko bidea egiten ari gara orain, eta aste batzuk barru amaitzea espero dugu”.
Hiri Antolamenduko Plan Orokorrari (HAPO) dagokionez, erabakiak hartzen joan direla aitatu du alkateak proposamena egiteko, eta hurrengo xedeak jendaurrean aurkeztu eta aurrera botatzea izango dela argitu du.
Beste plan garrantzitsu bat ere zehazten hasteko asmoa erakutsi du Iriondok. “Emakume eta gizonen arteko lehen Berdintasun Plana garatuko dugu. Zelan egin zehazten hasiko gara, hurrengo urteetako aurrekontuetan sartzeko”.
Etxebarriko eskola ere udalaren lehentasunen artean dago. Proiektua Eusko Jaurlaritzaren datozen urteetako plangintzan sartuta dago, eta udalak, egin beharreko gastuen azterketa egingo dutela jakinarazi du, partidak jarri eta ekintzak aurrera eramaten joateko.
