Erik eta Irastorza Markina-Xemeingo Master Serieseko txapeldunak
Aurrelari mutrikuarrak eta Bidarteko atzelariak ez zieten aukerarik utzi Hormaetxeari eta Aimarri; set biak irabazi zituzten. Omenaldia egin zieten Euskal Herriko Herriarteko txapeldunei eta Victor Bereikuari.
Irabazleak, finalistak eta antolatzaileak, amaieran. Eric Irastorza eta Erik Mendizabalek eraman dituzte Markina-Xemeingo Master Serieseko txapelak. Bi set-ak irabazita (15-9/15-11) nagusitu ziren Bidarteko atzelaria eta aurrelari mutrikuarra. Pilotaren Unibertsitatea bete egin zuen Karmen Eguneko finalak beste behin ere, eta giro ona izan zen nagusi.
Txapeldunak, gorriz, aurretik jarri ziren set bietan, eta ez zieten arnasarik hartzen ere utzi Alex Hormaetxeari eta Aimar Aldazabali. Lehenengo setean, berehala hasi ziren tantoak pilatzen gorriak, hala ere, Hormaetxea eta Aimar ez zeuden etsitzeko eta 12-6 tik aurrera tantoak kateatzen hasi ziren markagailuari buelta eman nahirik. 12-9 hurreratu ziren, baina akatsen eta Mendizabalen joko onaren eraginez lehen set-a gorrientzat izan zen.
Lau finalistak (Hormaetxea, Aimar, Erik eta Irastorza) eta Jose Luis Bereikua Elorrioren anaia.
Emozio gehiago ekarri zuen bigarren set-ak. Gorriak aurretik ibili baziren ere, urdinek aurre egiten jakin zuten; tanto ikusgarriak eskaini zituen Hormaetxeak eta publikoaren txalo eta txistu hotsak jaso zituen. 13-11 hurreratu ziren, baina Irastorza eta Mendizabalen sendotasunari ez zegoen zulorik bilatzerik. Irastorza nagusi izan zen atzean eta mutrikuarraren sakeak ikusgarriak izan ziren.
Meabasterretxea-Salegi eta Arbe-Mandiolaren arteko norgehiagokagaz hasi zen jaialdia. Partidu bikaina eskaini zuten bikoteek. Jon Meabebasterretxeak eta Eñaut Salegik irabazi zieten Jokin Arbe eta Jon Mandiolari (12-15/15-10/2-5). Eta finala hasi aurretik, omenaldia eskaini zieten Euskal Herriko Herriartekoa irabazi duten Markina-Xemeingo Zesta-Punta Eskolako puntistei bai eta aitorpen txiki bat Victor Bereikua Elorrio-ri. Aurreskuaren ondoren, Elorrioren anaia Jose Luis Bereikuak (zesta-puntan Berri izenagaz jokatutakoa) bota zuen hasierako txapa.
Partidu bien artean egindako omenaldia.
Victor Bereikua gogoan edukiko dute berriro ere, bere omenez jokatu den txapelketaren finalean. Zapatuan [uztailak 20] jokatuko dira finalak, 19:00etatik aurrera, Pilotaren Unibertsitatean.
