Markina-Xemeingo Antonio Ibarluzeak bigarren postuan hasi du Euskal Herriko Hiru Txirlo Txapelketa
69 bolarik parte hartu zuten Itziarko Lastur auzoan zapatuan [urriak 19] egin zen lehen botaldian. Ziortza Bolibarko Iruzubieta auzoko bolatokian jokatuko dute bigarren jaurtialdia.
Antonio Ibarluzea bola botatzen zapatuan Lasturreko jaurtialdian. Argazkia: MX3T Partaidetza handiagaz hasi da Euskal Herriko Hiru Txirlo Txapelketa. 69 bolarik parte hartu zuten, hain zuzen, Itziarko Lastur auzoan zapatuan [urriak 19] egin zen lehen botaldian. Lehen jaurtialdiko sailkapenaren buruan Elgoibarko Xabier Loiola (San Migel) geratu zen, 7 txirlo botata, eta bigarren Markina-Xemeingo Antonio Ibarluzeak (Iruzubieta) egin zuen, 6 txirlogaz.
Hirugarren eta laugarren postuetan, bosna txirlogaz, Elgoibarko Jabier Osoro (San Migel) eta Eibarko Sergio Rodrigez (Eibar) geratu ziren. Bostgarren eta seigarren postuetarako, berriz, parrekoak egin behar izan zituzten, zortzi bolarik jo zituzten-eta launa txirlo. Azkenean, 4 txirlogaz Azkoitiko Gorka Etxaniz (Floreaga) izan zen bosgarrena eta Eibarko Bittor Ugarteburu (Asola Berri) seigarrena.
30. Euskal Herriko Hiru Txirlo txapelketako lehen saioa; Xabier Loiola irabazlea eta antolatzaileak. Argazkia: MX3T
Antolatzaileek esan dutenez, argi geratu da denentzako bolatoki bat prestatzea posible dela. “Adibiderako, Xabierrek indarra eta teknikarekin bota zuen eta Antoniok teknika erabiliz bidea aurkitu, horra hor emaitzak”.
Egunari amaiera emateko, gainera, sari banaketaren ondoren, Catalunyako herriarekin bat egiten dutela isladatzeko, famili-argazki bat atera zuten.
CATALUNYA-ko herriarekin bat egiten dutela isladatzeko, famili-argazki bat atera zuten amaieran. Argazkia: MX3T
Datorren zapatuan (Urriak 26) izango du jarraipena txapelketak Ziortza Bolibarko Iruzubieta auzoko bolatokian. 17:00etan izango dute hitzordua bertan bolariek.
