Xistera Zirkuituko sailkapen orokorrerako puntuak batzen jarraitzen dute Arbek eta Andonegik
Zapatuan Donibane Garazin jokatu zen Mutilen Xistera Zirkuituko Lehen Mailako bigarren kiniela irabazi dute Arbe markina-xemeindarrak eta Andoegi mutrikuarrak
Jokin Arbe puntista markina-xemeindarra eta Aitor Andonegi mutrikuarra. Argazkia: Xistera Zapatuan [urriak 19] Donibane Garazin jokatu zen Mutilen Xistera Zirkuituko Lehen Mailako bigarren kiniela irabazi dute Jokin Arbe markina-xemeindarrak eta Aitor Andoegi mutrikuarrak. Eskuratutako puntuak ondo etorriko zaizkie, izan ere, zirkuitua hirugarren fasean sartu da jada, eta sailkapeneko burua estutzen ari da. Bigarren jardunaldia izan da asteburukoa eta hiru mailetako pilotariak atera ziren kantxara.
Lehen mailako lehenengo kinielan Alberro eta Mandagan izan ziren nagusi, eta atzetik Urrutia eta Uranga sailkatu ziren 13 tantogaz. Bigarren kiniela irabazteko lehia, ostera, lau bikoteren artean egon zen, baina garaipena Arbek eta Andonegik eraman zuten, azkenean. Bigarrenak, berdinduta, Agirre (Zumaia) eta Danel Mandiola (Markina-Xemein), Antxon Alberdi etxebarritarra (Berriatua Zesta Eskola) eta Uranga (Zumaia) eta Aaron (Gasteiz) eta Mikel Manzisidor (Danok Bat Mutriku) sailkatu ziren.
Bigarren mailako lehen kiniela, berriz, etxean gelditu zen. Urrutia eta Harinordoki izan ziren 15 tantora heltzen lehenengoak eta bigarren postuan Victor eta Oyhenard sailkatu ziren. Bigarren kinielan, berriz, Aitzol Galletebeitia lekeitiarra eta Sorozabal izan ziren onenak, eta atzetik, Vidal eta Garat geratu ziren.
Hirugarren mailan Sasiain eta Del Rio izan ziren aurreneko kinielako onenak, eta bigarren postuan berdinduta geratu ziren Garat-San Jose, Egaña-Iriondo, Larrageneuy eta S.Rodriguez. Azken kiniela, ostera, Garat eta A. Rodriguezek irabazi zuten.
Munitibarren. Bestalde, domekan [urriak 20], Kadeteen zirkuitua ailegatu zen Munitibarrera. 11.00etatik aurrera jokatu zituzten puntistek zirkuituko bosgarren saoia. Guztira, bi kiniela jokatu zituzten, bakoitza 15 tantokoa.
Lehenengo kinielako irabazleak Ekaitz Bilbao (Berriatua) eta Dottax izan ziren eta Markel Arantzeta (Berriatua) eta Caballero geratu ziren bigarren. Bigarren kinielako onenak, ostera, Hodei Saizar (Berriatua) eta Lopez de Suso izan ziren, eta 12 tantogaz Garcia eta Caballero gertau ziren bigarren.
