Eguraldi eskasa baina giro ona eduki dute Markina-Xemeingo Teresa Donearen jaietan
47 umek parte hartu dute jauen baitan ospatu den 25. Margo Lehiaketan. Jolasak eta musika izan dira protagonista.
Umeak jolasten Beheko Arrabaletako jaietan. Argazkia: Markina-Xemeingo Guraso Elkartea Atxondoa auzoko Beheko Arrabaleko jaietako margo lehiaketako artelan guztiak ikusgai daude egunotan, Bikale tabernan. Asteburuan ospatu zuten 25. Margo Lehiaketa eta 47 umek parte hartu zuten bertan. Eguraldi eskasa, baina giro ona eduki zuten Teresa Donearen jaietan. Eguraldi hotz eta iluna, hala ere, asko izan ziren jaietara hurreratu ziren ume eta helduak.
Goizean egin zituzten margolanak artista txikiek, eta arratsaldean banatu zituzten sariak. Aurtengo sarituak ondorengoak izan dira:
-
3-4 urte bitarteko kategorian: Aimar Ormaza (3 urte), Gaia Unanua (4 urte), Naroa Egurrola (3 urte) eta Iraia Egaña (4 urte).
-
5-6 urte bitarteko kategorian: Elene Ormaza (6 urte), Elaia Arriaga (6 urte), Jule Egia (5 urte) eta Izar Ormaetxe (6 urte).
-
7-8-9 urte bitarteko kategorian: Iñaki Izagirre (9 urte), Ane Uberuaga (8 urte), Mikele Idoeta (9 urte) eta Izaro Barinagarrementeria (8 urte).
Eskolako materialagaz gainera, garaikurrak eta dominak ere eraman zituzten sari modura, eta “ilusio handiagaz” jaso zituzten.
Jolasak eta musika. Arratsalde polita igaro zuten jaietara hurbildu zirenek. 18:30 ingurura arte Markina-Xemeingo Guraso Elkarteak antolatutako egurrezko jolasekin jostatzeko aukera eduki zuten, baina ordu horretan euria hasi eta aterpean batu zen jende guztia. Bertan kokatu ziren Gari eta Amaia musikariak ere, eta aterpea dantzagune bihurtu zuten. Hantxe ibili ziren dantzan jo eta ke gaztetxoen kuadrillak. Hotza zegoenez, txokolatea ere “gustura” hartu zuten ume eta nagusiek. 30 litro prestatu zituzten auzotarrek, eta dena amaitu zen.
Euria zela eta, zapatuan [urriak 19] barruan geratu ziren, baina domeka goizean [urriak 20] kalean egon ziren buruhandiak. Auzoko aterpea hesi horiekin itxi eta bertan batu ziren umeak eta buruhandiak. Ordu eta erdi inguruan jaietako ekintza kuttunetako bategaz gozatu zuten umeek.
Auzoko andreeri, Guraso Elkarteari eta Markina-Xemeingo Udalari eskerrak eman dizkiote antolatzaileek, jaiak aurrera eramateko eskainitako laguntzagatik. “Laguntza horiek barik ezingo litzateke jairik egon. Eskerrak bai eta ere etorri ziren guztiei euren parte hartzeagatik”.
