16. Katu Baltza ospatuko dute Lekeition
Urtero modura eguna ekintzaz beteta dator. Goizetik gauera arteko egitarau oparoa prestatu du Katu Baltz Elkarteak.
Maria Talako eskulan tailerreko kideak emango dute aurten ere Erakusleiho onenaren saria. Aurten ere Katu Baltz egunak girotuko du azaroko bigarren asteburua Lekeition. Urtero modura eguna ekintzaz beteta dator. Goizetik gauera arteko egitarau oparoa prestatu du Katu Baltz Elkarteak, eta mozorroak jantzi eta kalera ateratzeko eguna izango dute zapatua [azaroak 9] lekeitiarrek.
Ohi modura pregoiagaz eta txapligu hotsarekin hasiko da jaia 11:30ean. Limoneroak izango dira jaiari hasiera emateko bilgune. Katu Baltz Elkartekoek pregoia irakurriko dute, eta ondoren, partaideen arteko hamaiketakoa egongo da eta umeentzako aurpegia margotzeko txokoa hasiko da martxan.
Doinurik ez du faltako egunak, herriko musika taldeekin batera kalejiran joateko. Horrela, 12:00etan Itxaropena Txistularien kalejira hasiko da, eta jarraian, Erakusleiho onenaren saria banatuko dute Lekitto Musika Banda eta Garraitz Kirol Taldekoekin batera kalerik kale abiatuta. Oraingoan ere, Maria Talako Eskulan Tailerrekoek edukiko dute saria banatzeko ardura.
Eguerdi partean ere Trikitilarien eta Dunbots joaldunen kalejirak egongo dira herrian zehar. Bestalde, Lekeitioko Elikagaien Bankuak bigarren eskuko gauzen azoka jarriko du Eskolapean. Goizean egongo da zabalik.
Ikuskizuna. Ume eta gaztatxoei begirako aukerak ere ez dira faltako. Patata Tropikala Antzerki Laborategiaren eskutik Kalean otso etxean uso antzezlana ikusteko aukera egongo da 17:00etan Ikusgarri zineman, doan. 2 urtetik 12 urte bitarteko haurrei zuzenduta dagoen antzezlanak bizikidetza eta ez da ez mezuak lantzen ditu modu didaktiko eta erraz batez. Horretarako ipuin desberdinak nahastu dituzte Hiru Txerritxoak eta Txano Gorritxo esaterako.
Antzezpenaren ostean jaiak plazan izango du jarraipena, eta bertara joateko kalejira egingo da zinematik plazara, Aittitta Makurra txarangarekin. Kontzijopean txokolate beroa emango dute eta Etorkizuna dantza taldearen dantzaldia eta suzko zezena ikusteko aukera egongo da plazan.
Iluntzea alaitzeko txikiteo abestua egongo da Eingo taldearekin batera, eta antolatzaileek aurreratu dutenez Kantu Tailerrekoek ere parte hartuko dute bertan. Jaia gaueko ordu txikiak arte luzatuko da, izan ere, Katu Baltz eguneko egitarauari ekarpena egin asmoz AKD DJ-a egongo da Galarrenan gabaz.
EGITARAUA
- 11:30. Eskolapean. Pregoia eta bolanderak; partaideen arteko hamaiketakoa eta umeentzako aurpegi margotzea.
- 12:00. Itxaropena Txistularien kalejira.
- Jarraian. Erakusleiho onenaren sari banaketa.
- 13:00. Trikitilarien kalejira; Dunbots joaldunak kalerik kale.
- Goizean. Lekeitioko Elikagai Bankuaren bigarren eskuko gauzen azoka.
- 17:00. Ikusgarri zineman kalean otso etxean uso antzezlana Patata Tropikala antzerki taldea.
- 18:00. Kalejira Aittitta Makurra txarangaren eskutik zinematik plazara.
- 18:30. Txokolatada Kontzijopean.
- 19:00. Etorkizuna dantza taldearen emanaldia.
- Jarraian. Suzko zezena.
- Ondoren. Txikiteo abestua Eingo taldeagaz.
