2020ko Elizpe Rocken parte hartzeko aukera zabalik dago
2020ko apirilaren 18an ospatuko da Etxebarriko hirugarren jaialdia. Bakarlari eta taldeek abenduaren 15era arte daukate izena emateko epea.
Ondarroako Aesthetic taldearen kontzertua 2019ko jaialdian. Etxebarriko hirugarren Elizpe Rock musika jaialdiak badauka eguna zehaztuta. 2020ko apirilaren 18a aukeratu dute aurten jaialdia ospatzeko, eta aurten ere, eskualdeko musika estilo guztietako bakarlari eta taldeen plaza izatea nahi dute antolatzaileek, hori dela eta parte hartu nahi duen guztiak ateak zabalik dituela jakitera eman dute.
Jaialdian parte hartu ahal izateko mezu elektroniko bat bidali behar dute bakarlari edo taldeek elizperock@gmail.com helbide elektronikora, taldearen izena, nongoak diren eta kontaktu bat jarrita. Izena emateko azken eguna abenduaren 15a izango da.
Antolatzaileak hasita daude jada jaialdirako egitaraua pentsatzen, eta aurreratu dutenez, aurreko urte bietako formatu bera jarraituko du. Lea-Artibaiko hamazortzi taldek parte hartu zuten estreinako jaialdian, eta beste horrenbeste batu zituen bigarrenak ere. Datorrenak ere erantzun bera izatea espero dute.
