Auzo batzarrak egingo dituzte Munitibarren, zapatuan hasita
Guztira sei bilera egingo dituztela zehaztu dute Munitibarko udal ordezkariek. Zapatuan [azaroak 9] egingo dira lehenengo biak, eta gainerakoak azaroaren 16an eta 23an.
2015ean Aldaka auzoan egindako auzo batzarra. Herritar guztien artean herriko auzoak hobetzeko helburuagaz, Munitibarko Udalak sei auzo batzar egingo ditu, zapatuan [azaroak 9] hasita.
Bilerak hiru egunetan banatuta egingo dituztela zehaztu eta auzotarrei bileretan parte hartzeko gonbitea egin diete udal ordezkariek.
Besteak beste, hobetu beharreko puntuak eta auzotarrek dituzten kezkak dira bileretan landuko direnak.
Udalak udalerriaren norabidean eta udalaren erabakietan herritarren parte hartzeak duen garrantziari eusten jarraitzen dio. Hala, orain egingo dituzten auzo batzarrak ere Zeuaz egitasmoaren barruan daude, aurreko urteetan egin legez.
Egutegia
- Zapatua [azaroak 9]. 10:00etan Totorika, frontoi ondoan. 12:30ean Gerrika eta Uriona, Santa Luzia ermitan.
- Azaroak 16. 10:00etan Ganbe, eskolan. 17:30ean Gerrikaitz, Bengolan.
- Azaroak 23. 10:00etan Berreño, autobus geltokian. 12:30ean Aldaka, Santiago ermitan.
