Taloa egiten irakatsiko dute Etxebarrian
Zapatuko [azaroak 16] ikastaroa 17:00etan hasiko da eta ordubete inguru iraungo du. Egindako taloak dastatuko dituzte ondoren.
Urteroko ohiturari eutsita, aurten ere taloa egiten erakutsiko dute ETX kultur elkarteko kideek. Zapatuan [azaroak 16] jarri dute hitzordua, elizpean. Azaldu dutenez, frontoia obretan dagoenez, liburutegi azpiko aterpean prestatuko dute taloak egiteko txokoa, musikagaz giroturik.
Ikastaroa 17:00etan hasiko da eta ordubete inguru iraungo duela aurreratu dute, eta, ondoren, askaria egingo dute parte hartzaileek prestatutako janariagaz. «Txorizoagaz eta txokolateagaz jango ditugu egiten ditugun taloak».
Ikastaroa doakoa izango da, eta antolatzaileek eramango dute taloak egiteko behar den guztia bai osagaiak zein ontzi, plater eta zapiak ere. «Parte hartzaileek taloak egiteko gogoa besterik ez dute ekarri beharko». Ekimena herritar guztiei zabalik dagoela azaldu dute, eta, beraz, herriko ume, gazte eta nagusi guztiak gonbidatu dituzte parte hartzera.
