Zabalik dago Euskararen Egunean Ondarroan egingo duten danborradarako izen-ematea
Beste urte batez ekintza Zaldupe eskola publikoak eta Hondar Ahua guraso elkarteak egingo da, eta parte hartzeko deialdia herritar guztiei egin zaie. Azaroaren 26ra arte izena eman ahal da.
Parte hartzaile batzuk, iazko danborradan. Abenduaren 3an, Euskararen Egunean, Ondarroa eta ondarrutarrak kalera aterako dira beste behin ere. Eta euskaraz bizi nahi dutela aldarrikatzeko danborrada egingo dute, Zaldupe eskola publikoak eta Hondar Ahua guraso elkarteak antolatuta.
Izena emateko azken eguna azaroaren 26a da. Ondoko lekuetan izena eman ahal da: Kurike, Kitxu eta Brontxe dendetan, telefonoz deituta (94-683 36 68) edo Hondar Ahuaren webgunean. Herritar guztiak ekimenean parte hartzera deitu dituzte. “Euskark batzen gaituelako, animatu denok”.
Zehaztu dutenez, guztira hiru entsegu egingo dituzte: Azaroaren 27a eta 28an, eta abenduaren 2an, 16:30etik 17:15era eta 17:15etik 18:00etara.
Abenduaren 3an danborrada 17:30ean abiatuko da, Zaldupetik. Eta gogorarazi dute parte hartzaileak arrantzale arropagaz joan beharko direla. “Gerrikoa eraman beharko da, eta arropak ezin du bestelako ikurrik eduki”.
