108 korrikalari batu ditu Berriatuko VII. Errege Bideko Krosak
Elzibieta Jaromiska eta Gaizka Garcia izan dira lehen emakumezkoa eta lehen gizonezkoa. Argia Urrutiak eta Lander San Antonek osatutako bikotea, berriz, lehenengo bikote misto berriatuarra.
VII. Errege Bideko Kroseko irabazleak. Argazkia: Urepel KT Giro onean egin da, aurten ere, Saturrarandik Berriatura arteko VII. Errege Bideko Krosa. Guztira, 108 ume, gazte eta heldu animatu dira parte hartzera, eta eguraldia ere lagun izan dute.
Domekan [azaroak 24], 11:00etan, hasi zuten 8 kilometro pasatxoko ibilbidea Saturraranen, eta korrikalariek aterri eduki zuten ibilbide osoan. Ume eta gaztetxo batzuk Ondarroako kiroldegian hasi zuten krosa, eta beste talde batek Antzubixan ekin zion lasterketari. Izan ere, kirola sustatu eta denen parte hartzea bilatzen dute ekimenagaz Urepel Kirol Taldekoek, eta gero eta gehiago dira krosean parte hartzera animatzen diren adin guztietako korrikalariak.
Horien guztien artean, helmugara lehendabizi ailegatu zirenak Elzibieta Jaromiska eta Gaizka Garcia izan ziren. 28 minutu eta 54 segundotan osatu zuen bidea Garciak eta 38 minututan Jaromiskak. Bestalde, iazko modura, Argia Urrutiak eta Lander San Antonek osatutako bikotea izan zen helmugara ailegatu zen lehenengo bikote misto berriatuarra. 36 minutu eta 42 segundotan ailegatu ziren Berriatuko helmugara.
Lasterketagaz “oso gustura” gelditu zirela azaldu zuten parte hartzaileek amaieran. “Bide polita” eta “giro ona” azpimarratu zituzten. Gainera, indarrak berreskuratzeko, probaren amaieran, kopaua egon zen parte hartzaile guztientzat, ete hori ere “pozik” hartu zuten.
Korrikalariak VII. Errege Bideko Kroserako izena ematen. Argazkia: Urepel KT
Korrikalariak VII. Errege Bideko Krosa hasteko prest. Argazkia: Urepel KT
VII. Errege Bideko Kroseko irabazleak helmugan. Argazkia: Urepel KT
