510 pertsonak egin dute XIII. Ziortza-Bolibarko mendi martxa
Antolatzaileak eta parte hartzaileak "gustura" egon dira, eta balorazio positiboa egin dute Aranbaltz Kultur Elkartearen arduradunek.
Argazkia: Aranbaltz Kultur Elkartea. Ziortza-Bolibarko desanexioaren XV. urteurrena gogoratzeko mendi martxa egin zuten domekan. Hamahirugarren mendi martxa izan da aurtengoa, eta 510 parte hartzaile batu ziren. Horietatik 176 pertsonak egin zuten mendi martxa luzea, eta gainontzekoek, laburra. “50 bat pertsonak egunean bertan izena eman zuten”, azaldu dute Aranbaltz Kultur Elkartearen arduradunek.
08:00etan irten ziren martxa luzekoak plazatik, urteroko ibilbideari ekiteko. 25 kilometroko martxa, baina, 28 kilometro pasatxokoa izan da aurten. Izan ere, gauean pinuak jausi ziren ibilbideko zati batean, eta ondorioz, beste parte batetik desbideratu behar izan zuten ibilbidea antolatzaileek. “Hala ere, balorazio nahiko positiboa egin dugu, ez baitzen bestelako arazorik egon”. Bestetik, 10:30ean irten ziren 10 kilometroko martxa egin zutenak.
Antolatzaileen berbetan, parte hartzaileak gustura aritu ziren. Eguraldiak eragin nabarmena eduki zuen, ibilbidean zehar lokatz eta ur putzuak aurkitu zituztelako nonahi.
Amaieran, giro ederrean batu ziren kopauan.
*ARGAZKIAK: Aranbaltz Kultur Elkartea
