2020 urterako 8,5 milioi euroko aurrekontua onartu dute Lekeition
EAJren aldeko botoekin eta EH Bilduren abstentzioagaz onartu zuten 8.559.151 euroko aurrekontua. EH Bilduk aldaketa klimatikoari aurre egiteko egindako 50.000 euroko proposamena aurrekontuetan sartu dute.
2020 urterako aurrekontuak onartu zituen Lekeitioko Udalak astelehenean [abenduak 2] egin zuten osoko bilkuran. EAJren aldeko botoekin eta EH Bilduren abstentzioagaz onartu zuten 8.559.151 euroko aurrekontua.
Udal Gobernuak aurkeztutako lehen proposamenari herritarren iritzi eta ekarpenak gehitu dizkietela jakitera eman dute. «Guztira 11 ekarpen egon dira, ia denak ontzat emanez», argitu dute. Herritarren ekarpenez gainera, EH Bilduk aurkeztutako aldaketa klimatikoari aurre egiteko proposamena ere aurrekontuetan sartu dute. «50.000 euro bideratuko dira eginkizun horretara».
Aurtengoa baino aurrekontu handiagoa edukiko du datorren urtean Lekeitiok, 122.000 gehiagoko aurrekontua, hain zuzen. Eta, aurrekontu horren lehentasunak gizarte zerbitzuak, hezkuntza, euskara eta berdintasun arloak izango direla jakitera eman dute. Gizarte zerbitzuei dagokionez, etxeetan suteak ez gertatzeko ke detektagailuak jartzeko onuradunen adina 86 urtetik 83ra jaitsiko dutela azaldu dute eta gizarte larrialdietarako eta gizarte programetarako diru sailak zein 18-35 urte bitarteko herriko gazteei zuzendutako etxebizitzen alokairurako diru-laguntzak mantendu egingo dituzte. Bestalde, berdintasun zerbitzuaren maiztasuna bikoiztu egingo da.
Euskarari dagokionez, besteak beste, ikasle etorkinei zuzendutako errefortzuko euskara ikastaro orduak bikoiztuko dira, eta AEKgaz hitzarmena sinatuko dute lokalak berrizteko.
Inbertsioak. Udal aurrekontuaren %9a inbertsioak egiteko erabiliko da. Zehatz esateko, inbertsioen atala 778.500 eurokoa izango da. Proiektu nagusien artean daude futbol zelaiaren lehen fasea (230.000 euro) eta musika eskola egokitzeko azken fasea (190.000 euro). Horrez gain, San Inazio, Aldamiz Etxebarria eta Harbiatx kaleetako argiteria aldatuko dute (60.000 euro).
Hezkuntza alorrean ere hobekuntzak iragarri dituzte. Haurreskolan eta eskolan inbertsioak egingo dituzte, eta Ateako eraikinean dagoen helduen hezkuntzarako gelak egokituko dituzte. Lan horietara guztietara 100.000 euro bideratuko dituzte.
Inbertsioen ataleko beste kopuru bat Ikusgarri zinema aretoan hobekuntzak egiteko izango da (10.000 euro). Besteak beste, argiteria led sistemara aldatuko dute. Gainera, Ikusgarrin egiten diren zinema emanaldi eta beste ekintza kulturalen programazioa mantentzeko laguntza jasoko du Zinemazaleen Elkarteak.
Mendieta Ontziola eta Abaroa dira inbertsioen ataleko beste atal aipagarriak. Horietako bakoitzera 30.000 euro bideratuko dituzte. Apalloako eraikinaren teilatua ere konponduko dute (25.000 euro), eta azkenik, bizikleten bide sarea osatzen jarraitzeko 25.000 euro gorde dituzte.
Herriko kaleak iriste errazagoak egiteko helburuagaz, kaleak berritzera bideratuko dute inbertsioen ataleko kopuru bat. «Herri lanen arloan kaleak iriste errazagoak egiten jarraituko dugu: zebrabideak, espaloiak, argiteria, barandak, lorategiak, zuhaitzen inausketak eta fumigazioak, kalatxorien eta katuen kontrol kanpainak, lekeitiarrentzat uda sasoian aparkalekuak ziurtatzeko sistema eta abar».
Kultura eta kirola. Era berean, kirol eta kultur ekintzak sustatzen jarraituko dutela azaldu dute. «Herriaren garapenerako onuragarriak eta inpaktu ekonomikoa duten kirol ekintzak bultzatzen jarraituko dugu: triatloia, Ondarru-Lekitto lasterketa eta estropadak. Udalak, besteak beste, mendi martxa eta spinning maratoia antolatuko ditu». Gainera, Isuntza arraun elkarteari TKE ligan parte hartzeko laguntza emango diote.
Urtero modura, Kaleka, Euskal Zine Bilera eta San Pedro eta San Antolin jaiak bultzatuko ditu udalak. San Pedro jaien aurrekontuak eta urteko ekintzak antolatzeko kultur elkarteek jasoko dituzten diru laguntzek ere gorakada izango dute. San Pedro jaietarako aurrekontua 24.464 eurokoa izango da, eta San Antolin jaietakoa 113.235 eurokoa.
Pertsonal gastua 3,5 milioikoa izango da, eta udaleko beharginen soldatak igoko dituzte %2an. Gastu arruntek –argiteria, erregaiak, kale garbitasuna, kirol instalakuntzen garbitasuna, eraikinen mantenua– 3,3 milioiko kostua suposatuko dute, eta beste erakunde batzuei egin beharreko transferentziak –Mankomunitatea, Garapen Agentzia, Uema– 803.427 eurokoak izango dira.
