Ikastetxeak 'sine die' itxi ditu Jaurlaritzak
Aurreko aginduan eskolak 14 egunerako etengo zituztela adierazi zuten hezkuntza agintariek. Gaurkoan, berriz, "beste abisu bat eman arte" luzatu dute itxialdia. Osasun agintariek emaniko aholkuei zorrotz jarraitzeko eskatu du Hezkuntza Sailak.
Joan zen astean, aurrez aurreko eskolak bertan behera uztea erabaki zuen Jaurlaritzak. Orduko agintean 14 eguneko itxialdia agindu zuen Hezkuntza Sailak. Gaur [martxoak 18] bidalitako aginduan, ordea, itxialdia “beste abisu bat eman arte” luzatu duela jakinarazi du Jaurlaritzak.
“Gertaeren bilakaera” eta agintariak hartzen ari diren neurriak dira itxiera epea luzatzea erabakitzeko arrazoia, Hezkuntza Sailak oharrean azaldu duenez. Irakasle, ikasle eta gurasoei aurreko egunetan emaniko gidalerroek indarrean jarraitzen dutela gaineratu dute oharrean. Osasun agintariek emaniko aholkuei zorrotz jarraitzeko eskatzen diete denei, “normaltasunari ahalik eta lasterren berrekin ahal izateko”.