Zapatuan Ondarroara ez joateko deia egin dute eskualdeko hainbat udalek
Radixu Irratiak aurten Zapato Azula ez antolatzeko erabakia hartu bazuen ere, asko izan dira zapatuan [ekainak 27] Ondarroara joateko asmoa agertu duten bateko eta besteko herritarrak. Ondarroako Udalak egin modura, eskualdeko beste hainbat udalek ere herritarrei zentzuz jokatzeko eta zapatuan Ondarroara ez joateko dei egin diete.
Maiatzaren 18an jakinarazi zuen Ondarroako Radixu Irratiak aurten ez zutela Zapato Azulik antolatuko; COVID-19aren pandemiak sortutako egoeraren aurrean, «erabakirik onena» jaia ez ospatzea zela erabaki zuten. Dena dela, “normaltasun berria” indarrean dagoela eta herri batetik bestera mugitzeko aukeraz baliatuta, herritar batzuek zapatuan jaia egiteko asmoa agertu dute. Horren aurrean, Ondarroako Udalak herritarrei zein kanpotik etortzeko asmoa zutenei ekainaren 27an Ondarroara ez joateko eta jairik ez egiteko deia egin zien.
Baina Ondarroara ez joateko mezuak gehitzen ari dira egunotan. Hala, inguruko herri batzuetako udal ordezkariek ere euren herritarrei Ondarroara ez joateko eskatu diete. Besteak beste, Lekeitioko Udalak eta Mutrikuko Udalak herritarrei Ondarroara ez joateko eskatu diete.
Lekeitioko Udalak sare sozialen bidez egin du deialdia: “Ondarroara joatea pentsatuta izan duten herritarrei adierazten zaie, mesedez, bertan jairik ez ospatzeko. COVID-19ak eragindako egoera honetan beharrezkoa da denok erantzukizunez jokatzea”.
Joseba Palenzuela Mutrikuko alkateak bideo baten bidez egin du Ondarroara ez joateko eskaera: “Jende pilaketak saihesteko eta zintzo jokatzeko esan dute. Eta asteon, eskatu digute guk ere gure herritarrei Ondarroara ez joateko eskaera egiteko. Pena handiz, eskatu behar dizuet saiatzeko Ondarroara ez joaten eta herrian geratzeko. Hurrengoan etorriko da Ondarroara joan eta Zapato Azula ospatzeko eguna”.
Bestalde, sare sozialetan ondoko kartela ere zabaldu da (BarryBurlire-k eginda):
