Ondarroa gune gorrian egotera pasatu da
Joan den aste osoan 20 positibo erregistratu zituzten Ondarroan; astebetean 151 puntu igo da Ondarroako intzidentzia tasa. Bizkaian gune gorrian dagoen herri bakarra da Ondarroa. Igo egin dira baita ere Berriatuko, Lekeitioko, Markina-Xemeingo, Mendexako eta Mutrikuko tasak. Hiru lurraldeetako tasak ere igo egin dira.
Joan den asteko astelehenean 315,16eko tasa zeukan Ondarroak, eta gaur [urriak 25] 466,91ko tasa dauka. Beraz, gune laranjan egotetik gune gorrian egotera pasatu da. Bizkaian tasarik altuena daukan herria izaten jarraitzen du; lurraldean gune gorrian dagoen herri bakarra ere bada.
Aipatzekoa da joan den aste osoan 20 positibo erregistratu zituztela Ondarroan, eta erdiak baino gehiago (11) eguaztenean [urriak 20] erregistratu zituztela. Igo egin dira baita ere Berriatuko, Lekeitioko, Markina-Xemeingo, Mendexako eta Mutrikuko tasak. Dena dela, Lekeitiok gune berdean egoten jarraitzen du, eta Markina-Xemeinek eta Mutrikuk gune horian.
Araban Agurainek dauka tasarik altuena (691,20); gune gorrian dagoen Arabako herri bakarra da. Gipuzkoan, aldiz, egoera bestelakoa da. Gero eta herri gehiagotako tasak ari dira igotzen, eta Urnieta (595,91) eta Lazkao (426,14) dira gune gorrian daudenak.
Joan den aste osoan [urriaren 18tik 24ra] 32 positibo erregistratu zituzten Lea-Artibai eta Mutrikun, duela bi aste baino kasu 1 gehiago. Kasu gehienak Ondarroan erregistratzen jarraitzen dute (20), eta atzetik datoz Lekeitio (4), Mutriku (3), Berriatua (3), Markina-Xemein (1) eta Mendexa (1). Gainerako herrietan ez dute positiborik erregistratu.
Lurraldeak. Arabak 47,24ko tasa dauka (duela aste bat baino 4 puntu altuagoa), Bizkaiak 71,54koa (11 puntu altuagoa) eta Gipuzkoak 93,14koa (20 puntu altuagoa).
Herriz herriko intzidentzia tasak (urriaren 25ean eguneratuta):
- Amoroto: 0
- Aulesti: 0
- Berriatua: 238,66 (duela aste bat 0 tasa zeukan)
- Etxebarria: 0
- Gizaburuaga: 0
- Ispaster: 0
- Lekeitio: 55,35 (astebetean 42 puntu igo da)
- Markina-Xemein: 99,50 (astebetean 20 puntu igo da)
- Mendexa: 211,86 (duela aste bat 0 tasa zeukan)
- Munitibar: 0
- Mutriku: 188,18 (astebetean 19 puntu igo da)
- Ondarroa: 466,91 (astebetean 151 puntu igo da)
- Ziortza-Bolibar: 0
Lea-Artibai eta Mutrikuko bilakaera, 2020ko azarotik:
