Baserri bat erre da Munitibarren
Atzo [urriak 25] arratsaldean gertatu zen sutea. Segurtasun Sailak jakitera eman duenez, ez da zauriturik egon.
Suhiltzaileak Munitibarko sutea itzaltzen. Argazkia: Bomberos Bizkaia Etxebizitza batek su hartu zuen atzo [urriak 25] Munitibarren. 20:15ak aldera piztu zen sua baserri batean, eta suhiltzaileez gain Ertzaintza eta anbulantzia bat ere gerturatu ziren sutearen lekura.
Suhiltzaileek “berehala” kontrolatu zuten sutea, eta 23:18rako itzalita zegoen. Hala ere, badaezpada, talde bat zaintzen geratu zen, sua berriro pizten ez zela ziurtatzeko. Segurtasun Sailetik jakinarazi dutenez, ez zen zauriturik egon. Baserria erabat kaltetuta geratu da.
Munitibarko baserria, sutan. Argazkia: Bomberos Bizkaia
