Kamiñazpiko jaiak, kolokan
Antolakuntzak dio "erreleboa emateko ordua" ailegatu dela. Eguaztenean [martxoak 30] 18:00etan Pixape elkartean egingo den batzarrean parte hartzera gonbidatu dute jendea.
Kamiñazpiko jaiak antolatzen dituztenek dei trinko bat zabaldu dute: “Jende berria hurbildu ezean, 2022a izango da jaiak antolatzen ditugun azken urtea”. Jai batzordeko kideek urteak daramatzate jaiak antolatzen. Ardura hori hartu zutenean, jaiak “bertan behera geratzekotan” zeuden, eta beraien lanagaz lortu dute azken urteetan jai politak eta girotsuak antolatzea. Baina horren guztiaren atzean errealitate bat dago, eta nekatuta daudela adierazi dute: “Urtean lauzpabost lagun ibiltzen gara horren guztiaren atzean”.
Hori dela eta, batzar bat antolatu dute eguaztenerako [martxoak 30]. 18:00etan batuko dira Pixape elkartean, eta jaien antolakuntzan aritzeko eta laguntzeko prest dagoen guztiei zabaldu nahi izan diete parte hartzeko gonbidapena: “Jende berria eta ideia berriak behar ditugu”. Egun antolakuntzan daudenak laguntzeko prest daudela adierazi dute, baina erreleboa emateko unea heldu dela.
Eskatzen ari diren errelebo hori ematen ez bada eta jendeak prestutasunik ez badu erakusten, aurtengo jaiak “halan-holan” antolatuko dituzte, baina argi utzi dute “pena handia izango den arren”, aurtengoak izango direla azkenengo Kamiñazpiko jaiak.
