Sabin Foruria-Haitzasko lasterketa lehiatuko dute Markina-Xemeinen
Elite eta 23 urtez azpiko mailek parte hartuko dute Markina-Xemeingo txirrindulari elkarteak zapaturako [martxoak 26] antolatu duen proban. 117 kilometro osatu beharko dituzte txirrindulariek.
31. Sabin Foruria-Haitzasko Oroimenezkoa gizonezkoen afizionatu mailako txirrindulari lasterketa lehiatuko da zapatuan [martxoak 26] Lea-Artibaiko errepideetan zehar. Markina-Xemeingo txirrindulari taldeak udalagaz elkarlanean antolatutako lasterketak Elite eta 23 urtez azpiko txirrindulariak bilduko ditu.
15:30ean hasiko da lasterketa, eta parte hartzaileek 117,4 kilometroko ibilbidea osatu beharko dute.
Markina-Xemeindik Ondarroara abiatuko da lasterketa eta handik Lekeitiora joko du. Aulestirantz joango dira txirrindulariak eta handik Munitibarrera, Gontzogaraigane mendatea igo eta Ziortza-Bolibartik igarota Markina-Xemeinera itzuliko dira. Beste buelta bat eman beharko dute, baina, oraindik. Markina-Xemeindik Milloirantz joango dira eta Oletako bidegurutzean Munitibarrerantz hartuko dute berriro ere, Gontzogaraigane mendia igotzeko. Ziortza-Bolibartik igarota Markina-Xemeinera itzuliko dira txirrindulariak berriro.
Azken buelta, Aulestitik emango dute. Lekoizgane mendatea igo beharko dute, handik Munitibarrera jarraitu eta berriro Gontzogaraigane mendia igo. Ziortza-Bolibartik itzuliko dira berriro Markina-Xemeinera, helmugaratzeko.
