Berriatuko Futbol Taldeak bigarren mailari eustea lortu du
Berriatuko Futbol Taldeak Algortako Arraultzaldeon taldearen kontrako partidua 4-2 irabazi du, bigarren mailan mantentzeko. Penaltietan argitu da markagailua.
Argazkia: Leartigol Berriatuko Futbol Taldeak bigarren erregional mailako talde izaten jarraituko du datorren denboraldian. Kostata baldin bada ere, taldeak maila horretako jaitsiera saihestea lortu zuen atzo, Abadiñoko futbol zelaian, Algortako Arraultzaldeon taldearen kontrako partidu erabakigarria irabazita.
Bai Berriatuko Futbol Taldea, bai Arraultzaldeon bigarren mailako multzoetako 14. sailkatu bezala iritsi ziren 19:30ean hasi zen norgehiagokara: Arraultzaldeon, lehen multzoan, hamar garaipen eskuratuta bertaratu zen; Berriatuko Futbol Taldea, bigarren multzoan, ostera, zazpi garaipenegaz. Berriatuarrak oso goiz aurreratu ziren markagailuan: 8. minutuan Xabier Amorosek gola sartu zuen, aldaratze baten ondoren. Lehen zatian zehar, Berriatukoak nagusi izan ziren lehen zatian, eta atsedenaldira 1-0eko markagailuagaz joan ziren.
Aldageletatik itzultzean, bigarren gola sareratu zuen Julen Ormazabalek, 50. minutuan, baina epaileak gola ezeztatu zuen, jokoz kanpoko jokaldia izatearren. Une horretatik aurrera, Arraultzaleon hazi egin zen partiduan, eta 67. minutuan beraien helburua lortu zuten: berdinketa. Berriatuko taldearen atezainak eta defentsetako batek ez zuten elkar ulertu, eta Arraultzaldeonek aukera hori aprobetxatu zuten, partiduaren egoera errotik aldatzeko.
Argazkia: Leartigol
Luzapena eta penalti tanda. Bigarren zatia “oso fisikoa” izan zela adierazi dute Berriatuko taldekoek, eta bi taldeetako batek ere ez zuen lortu jokoan nagusi izatea. Horrenbestez, luzapenera joan ziren. Luzapenean biak ala biak “guzti-guztiagaz” joan ziren garaipenaren bila eta zenbait jokaldi arriskutsu ere egon ziren, baina ez zen inor aurreratu markagailuan. Ondorioz, penaltien tandara jo zuten, bigarren mailari zein taldeko eutsiko zion jakin ahal izateko.
Penaltien jaurtiketa “tentsioz gainezka” egon zen. Berriatuarren lehen jaurtiketa Ormazabalek egin zuen; baloia langara bidali zuen. Arraultzaldeonek, aldiz, bere jaurtiketa sartu egin zuen. Bigarren tandan, Grañak gola sartu zuen Berriatuako taldearentzat, eta aurkariak kanpora jaurti. Hirugarren eta laugarren tandetan protagonista nagusia Berriatuko atezaina, Peio Pereira, izan zen. Bere taldekideek penaltiak sarera bidali zituzten, baina berak arerioen azken bi jaurtiketak gelditu egin zituen. Pereiraren erakustaldiagaz, garaipena eta, beraz, bigarren erregional ligan jokatzen jarraitzea lortu zuen Berriatuko Futbol Taldeak.
Ondarrutik nahiz Berriatutik ikusle ugari mugitu ziren Abadiñora, Arraultzaldeonen aurkakoak taldearentzat “final zaporea” zeukan jakitun. Jokalariei babesa eta berotasuna erakutsi zieten zaletuek. Hurrengo denboraldiari begira, “bigarren mailan jarraitzea” izango da Berriatuko Futbol Taldearen jomuga nagusia.
