Mozorroz eta kolorez jantziko dute Munitibar San Pedro jaietan
Pandemia aurretik zuten formula berdinagaz datoz Munitibarko San Pedro jaiak, hiru eguneko egitarauaz.
Elkarteetako bozeramaileek eta herritarrek osatzen duten Jai Batzordeak, herritar guztiei begira antolatu du, aurten ere, hiru egunetako egitaraua.
Covidaren azken bi urteetan zapatura mugatu ziren San Pedro jaiak, eta guztia egun bakar bateara mugatu behar izan zuten. Hortaz, egun horri beste ukitu berezi bat emateko asmoz, herritarrei mozorrotzeko proposamena bota zieten, eta proposamen hori ohitura bilakatu da jada. Lehen urtean zirkua izan zen gaia eta bigarren urtean, berriz, piratak. Herritarren artean izandako harrera ikusita eta herrian sortzen den giroa bide hartuta, ohitura mantentzea erabaki dute, herriaren jai giroak beste berezitasun bat hartzen baitu. Aurten, berriz, pertsonaia mitologikoak jarriko dituzte erdigunean.
Aldaketa nagusiena jan edana egunez aldatzea izan da. Orain arte barikuetan egin izan da, eta igandera aldatzea erabaki dute, aho batez. Igandean herritar guztiei gozatzeko aukera eskaintzeko asmoz berrantolatu dute egiteraua. Adin tarte guztiek batera gozatu eta herritarren arteko giroa sortzeko asmoz hartu dute erabakia. Hortaz, dantza emanaldia, trikitilariak eta pintxoak egongo dira. Arratsaldean, berriz, frontoia jarriko dute erdigunean, San Pedro txapelketako finalak lehiatuko baitira.
Domekan, memoria lekuen aurkezpen gidatua egingo dute, Ahaztuen Oroimena elkarteagaz batera, eta panel informatiboak egongo dira ibilbidea osatzen.
Herri bazkaria, indargune.
Egitarauko unerik bereizgarriena herri bazkaria izaten da. Adin guztietako herritarrak biltzen dira, koadrila eta lagunartean, elkarren konpainia bide gozatzeko asmoz. Izen ematea udaletxeko administrazioan eta liburutegian egin beharko da, ekainaren 30a baino lehenago. Jan edanagaz gozatu ostean, festarekin jarraitu eta musikari bide emango diote, Sakatu elektrotxaranga eta Iratza erromeria entzungai izango dituzte.
EGITARAUA
Uztailak 1, barikua
- 17:30. San Pedro Txapelketako finalak, frontoian.
- 19:30. Pregoia eta txupinazoa, Munitibarko umeen eskutik, frontoian.
- 20:00. Sabin kontzertua, herriko plazan.
Uztailak 2, zapatua
- 11:00. Memoria lekuen aurkezpen gidatua, herriko plazatik.
- 12:00. Umeentzako puzgarriak eta jolasak, frontoian.
- 14:30. Herri bazkaria, herriko plazan.
- 18:00. Sakatu elektrotxaranga, herriko plazatik.
- 21:30. Iratzar erromeria, herriko plazan.
Uztailak 3, domeka
- 12:30. Dantza emanaldia, Munitibarko dantza taldearen eskutik, herriko plazan.
- Ondoren. Pintxoak eta trikitilariak.
- 17:30. San Pedro Txapelketako finalak, frontoian.
