Andra Mari jaietako kartel lehiaketa abian da
Ondarroako Udalak andramariak iragartzeko kartel lehiaketa abiarazi du. Irabazleak 600 euroko saria lortzeko aukera izango du, eta uztailaren 13a orduko aurkeztu behar dira lanak.
Lehiaketan edonork parte har dezake, eta gaia librea izango da. Udalak gogorarazi duenez, edozein teknika erabili ahal izango da. Behar guztiak A-3 neurrian aurkeztu beharko dira, euskarri gogorrean edo paperean. Era berean, egile bakoitzak lan bakarra aurkeztu ahalko du.
Lehiaketara aurkeztu beharreko kartelek honako testua izan beharko dute idatzita, nahitaez: 2022 Ondarroako jaiak, Andra Maixak (letra txikiagoan) eta Abuztuaren 11tik 17ra (letra txikiagoan).
Lanak udal erregistro orokorrean edo Ondarroako Egoitza elektronikoak aurkeztu beharko dira. Postaz aurkezteko asmoa izanez gero; Ondarroako Udala 48.700 Ondarroa, helbidera bidali behar dira, Jaietako Kartel Lehiaketa gutunazalean idatzita. Lan guztiak gutun azal itxi batean aurkeztu beharko dira, eta beste gutun azal batean azaldu beharko dira egilearen datuak. Azken eguna uztailaren 13a izango da, 13:00ak baino lehenago.
Ondarroako Udalak aukeratuko du kartelik onena sarituko duen epaimahaia, eta aurkeztutako lanek behar den besteko kalitaterik ez badute, saririk ez ematea erabaki dezakete.
