Bizkaiko herriarteko txapelketak Markina-Xemeinera egin du
Markina-Xemeinek Lezama menperatu du Bizkaiko herriarteko esku pilota txapelketan, hiru partiduetako bi eskuratu ondoren: kadete mailan 22-1 irabazi dute; gazte mailan, 10-22 galdu; eta nagusi mailan, azkenekoz, 22-18 gailendu dira, lehiaketa eskuratzeko.
Argazkia: Markina-Xemeingo esku pelota taldea. Markina-Xemeinek Bizkaiko herriarteko esku pilota txapelketa irabazi zuen, atzo, Lezamaren kontra gailenduta. Hilabete eta erdiren ondoren, Markina-Xemeinek nagusitasuna erakutsi du txapelketan zehar; finalera Munitibarren aurka modu sendoan irabazita igaro zen, eta gauza berbera egin zuen Lezamaren kontra. Markina-Xemeingo esku pilota taldekoak “oso pozik eta asebeteta” agertu dira garaipenagaz, eta “helburuak ondo beteta” amaitu dutela adierazi dute: “Lehiaketa hasieran hautagai nagusietako bat ginen, eta erakutsi dugu maila handian ibiltzeko gai garela; herriartekoa txapelketa berezia da, eta urtero-urtero ahalik eta hoberen prestatzen saiatzen gara”. Markina-Xemein Bizkaiko herriarteko txapelketa gehien dituen udalerria da; zazpi dauzka, Ermuak baino bat gehiago.
Lezama “aurkari gogorra” dela azaldu dute. Izan ere, iaz ere arerio hori izan zuten finalean aurkari markina-xemeingo pilotariek, baina orduan galdu egin zuten. Oraingo honetan, ostera, garaipena eskuratu dute, partiduen dinamikak iazkoen “nahiko antzekoak” izan diren arren. “Kadete mailan 22-1 irabazi genuen, gainera, nagusitasunez; gazte mailan, aldiz, zalantza batzuk izan genituen, eta 10-22 galdu genuen”, adierazi dute Markina-Xemeingoek. Nagusi mailan, horrenbestez, “tentsioa eta urduritasuna” izan ziren nonnahi: “Nagusiek partidu hobeak jokatu izan dituzte, baina, dena dela, asmatu zuten norgehiagoka aurrera ateratzen, eta garaipena eskuratu zuten”. Azken partidu horretan, hain zuzen ere, 22-18 irabazi zuten.
Hurrengoei begira. Joko aldetik “hobetzeko modukoak” izan ziren zenbait jokaldi egon arren, herriarteko txapelketa irabaztea, hau da, “helbururik garrantzitsuena” bete zuten pilotari markina-xemeindarrek. Gainera, herrikoen berotasuna eta babesa ere izan zuten, frontoia ikuslez bete baitzen. Datorren urteko herriarteko txapelketari begira, helburu argi askoak dituzte: “Aurten erakutsitako maila eta hautagaitza frogatu gura ditugu. Helburua garaipenaren bila ateratzea izango da; urteak joan, urteak etorri erakutsi izan dugu horretarako gai garela, eta dinamika horri eutsi behar diogu”.
