Finalerdietarako bidea, argituta
Iñaki Osa Goikoetxeak eta Eñaut Salegik Diego Beaskoetxearen eta Julen Del Rioren kontra irabazi dute Markina-Xemein Jai Alai Grand Slam txapelketan. Jokin Arbek eta Jon Ibarluzeak, ostera, Jean Olharanen eta Nicolas Etxetoren aurka galdu dute.
Goikoetxea eta Salegi. Argazkia: Zigor Etxebarria. Zehaztu dira Markina-Xemein Jai Alai Grand Slameko finalerdietara igaroko diren bikoteak. Zapatuan Uni frontoian lehiatutako partiduan, Iñaki Osa Goikoetxea zumaiarra eta Eñaut Salegi markina-xemeindarra, batetik, eta Jean Olharan pautarra eta Nicolas Etxeto bidartarra, bestetik, nagusi izan ziren jokatu zituzten partiduetan, eta elkarren aurka jokatuko dute datorren zapatuan. Bi aste barru, aldiz, Aritz Erkiaga ispastertarrak eta Jon Bullet Zabala markina-xemeindarrak Xabi Barandika gernikarraren eta Julen Del Rio gasteiztarraren kontra jokatuko dute beste finalaurrekoa.
Argazkia: Zigor Etxebarria.
Ligaxkako hirugarren jardunaldian ere Uni ikuslez lepo agertu zen: 500etik gora ikusle hurreratu ziren pilotalekura, giro ederrean. Eñaut Salegi izan zen izar nagusia: maila bikainean aritu zen herrikideen aurrean. Bera eta Goikoetxea beteranoa jaun eta jabe izan ziren Diego Beaskoetxea gernikarraren eta Imanol Lopez zumaiarraren kontrako partiduan. Beaskoetxea eta Lopez hautagai izan arren, Donostian lehiaketatik kanporatuta geratu ziren, eta baita Markina-Xemeinen ere.
Zapatuko norgehiagoka ere kontran izan zuten, maila polita erakutsi arren: 2-6 galtzen hasi ziren, baina markagailua irauli zuten, eta bi tantogatik aurreratu ziren; partiduko momenturik eztiena izan zen bikote gorriarentzat. 12-9ko markagailura iritsita, baina, Goikok aurrea hartu zuen, eta, Salegiren laguntzagaz, 13-13ko berdinketa eta 13-15 gailentzea lortu zuten urdinek. Bigarren seta oso berdindua izan zen 9-9ra arte. Orduan, beste behin, Goikoren presentzia areagotu egin zen, eta 11-15eko markagailuagaz irabazi zuten urdinek.
Hortaz, B multzoko lehen bikote modura pasatu dira Goikoetxea eta Salegi finalerdietara, zortzi puntugaz; Barandika eta Del Rio dira multzo horretako bigarrenak, hirugaz; Beaskoetxea eta Lopez, ostera, lehiaketatik kanporatuta geratu dira, puntu bakarra lortuta. Lehen partidua amaituta, Erika Mugartegi eta Arai Lejardi pilotari markina-xemendiarrei omenaldia egin zieten; Emakumezkoen Europako Kluben Kopan lorturiko garaikurra erakutsiz atera ziren pilotalekura.
Argazkia: Zigor Etxebarria.
Etxekoak, oso hurre. Zapatuko bigarren partiduan, Jokin Arbe eta Jon Ibarluzea markina-xemeindarrek Jean Olharan eta Nicolas Etxeto menderatzea bilatu zuten, partidu oso lehiatu batean; ia-ia ezustekoa eman zuten, baina pautarra eta bidartarra garaile suertatu ziren. Lehen setean, etxekoek hautagai nagusiei asko zaildu zieten partidua, eta 10eko berdinketara arte, norgehiagoka gidari barik egon zen; azken tantoetan, baina, Olharanek eta Etxetok zenbait akats egin zituzten, eta 12-15 irabazi zuen Markina-Xemeingo bikoteak.
Argazkia: Zigor Etxebarria.
Bigarren setean, maila askoz handiagoan agertu ziren hautagaiak, eta markina-xemeindarrek ezer gutxi egin ahal izan zuten. Arbek jokaldi eder askoak oparitu zizkien ikusleei, baina Olharanek eta Etxetok eroan zuten seta eta partidua: 15-7. Berdinketa hausteak ere bigarren setaren bide beretik egin zuen, baina urduritasun handiagoagaz: 2-2koagaz, Arbek eta Ibarluzeak irabazteko aukera izan zuten, baina Olharanek eta Etxetok azken esfortzua egin zuten, eta 5-2 nagusitu ziren. Emaitza horregaz, Erkiaga eta Zabala A multzoko lider bezala igaroko dira txapelketaren hurrengo fasera, zazpi puntu lorturik; Olharan eta Etxeto dira bigarrenak, lau puntugaz; Arbe eta Ibarluzea, berriz, kanporatuta geratu dira, puntu bakarragaz.
Argazkia: Zigor Etxebarria.
