Landrok jantzi du Amalloko 25. txapela
Zapatuan [ekainak 25] lehiatu zen Amalloko San Joan jaietako 25. Hiru txirlo Txapelketa. 30 bolarik parte hartu zuten jaurtialdian.
Euriari ere aurre eginda lehiatu zen zapatuan [ekainak 25] Markina-Xemeingo Amallo auzoan 25. Hiru Txirlo Txapelketa. Zerrautsagaz baliatu ziren antolatzaileak euriak eragindako potzuak estali eta bolatokia jokorako egoki jarri ahal izateko. Baldintzak hoberenak izan ez baziren ere, gogorik ez zen falta izan, eta horrela, 30 bolarik parte hartu zuten Amalloko 25. txapelketan.
Amalloko bolatokia jendez beteta, zapatuko 25. Hiru Txirlo txapelketan. Argazkia: Mikel Urkia Zuloaga/MX3T
Lehenengo geratu ziren laurak eraman zuten saria. Irabazlea Landro markina-xemeindarra izan zen, 9 txirlo bota zituen, eta haren atzetik, 8 txirlo botata geratu ziren hurrenez hurren, Atzotei, Urkia eta Poti.
Zerrautsagaz lagunduta egokitu zuten bolatokia antolatzaileek. Argazkia: Mikel Urkia Zuloaga/MX3T
Bestalde, jaietako 600 euroko zozketaren zenbaki saritua ere atera zuen zapatuan Amalloko Jai Batzordekoek. Zenbaki saritua 2.471 izan da, eta dagoeneko agertu da zorionekoa.
