Ibarreko umeen urteroko plaza
Lea Ibarreko Umeen Eguna hartu du Munitibarrek. Bailarako herritarrek eta, bereziki, haurrek denetariko jarduerez gozatzeko aukera eduki dute.
Iragan zapatuan [maiatzak 11], Lea Ibarreko Umeen Eguna ospatu zuten Munitibarren. Lea Ibarreko ume nahiz gaztetxoei zuzendutako jai eguna eizan zen. Urtez urte, txandapasa oinarri harturik, bailara hori osatzen duten udalerri bat arduratzen da jaialdia antolatzeaz, Lea Ibarreko Udal Mankomunazgoagaz elkarlanean, eta aurten, Munitibarrek hartu du. 16:00ak eta 19:00ak bitarteko egitarau ederra eduki zuten aurten Lea Ibarreko haurrek.
Tarte horretan, hainbat jarduera gozatzeko aukera ederra eduki zuten bertaratu ziren guztiek. Arratsaldean zehar, besteren artean, umeentzako jolas puzgarriak, ludoteka, beso birakaria, feriako jokoen zirkuitua edota aurpegia margotzeko txokoa egon ziren. Iluntzea, gainera, aho zapore gozoagaz borobildu zuten: 19:00ak aldera, Alain Zulaikak magia ikuskizuna egin zuen frontoian, eta jarraian txokolate janaldia egin zuten.
