Zabalik dago Malen Jaietako kartel lehiaketara lanak aurkezteko epea
Ekainaren 10a izango da azkenengo eguna. Jaietako egitarauaren azala eta kartela irudikatuko dituen lana aukeratuko dute. Umeen lehiaketari dagokionez, aurten, Malen Txiki egunean egingo dela zehaztu dute.
Urtero legez, Mutrikuko Udalak 2024ko Malen Jaietako irudiaren lehiaketa antolatu du, baina aurten egitarauaren azala eta jaietako kartelaren lana aukeratzeko lehiaketa izango da soilik. Umeen lehiaketari dagokionez, Malen Txiki egunean egingo dela zehaztu dute. Lehiaketan parte hartzeko interesa dutenek zabalik dute lanak aurkezteko epea eta ekainaren 10a (astelehena) izango dute horretarako azkenengo eguna.
Lehiaketan 16 urtetik gorakoek parte hartu dezakete, banaka edo taldeka, eta egile bakoitzeko lan bakarra onartuko da. Aurkeztutako lanak baldintza batzuk bete behar dituzte; originalak izan beharko dira, kartelaren gaiak jaiekin eta Mutrikuko herriarekin zerikusia izan beharko du eta beste herriren baten saritutako lanik ez da onartuko. “Ez da onartuko ikur politiko, homofobo edo sexistak dituzten lanik”.
Baldintza teknikoei dagokionez, teknika eta koloreak libreak izango dira, tamaina DIN A3koa izango da euskarri zurrunean finkatuta aurkeztuko delarik. Hala ere, kartelaren euskarri informatikoa ere aurkeztu beharko da A3 neurriko JPEG eta 300ppp-ko kalitatearekin gutxienez. Kartelean nahitaez agertu beharko da honako testua: MUTRIKU, Malen Jaiak 2024 Uztailaren 21etik 25era.
Lanak udaletxeko harreran aurkeztu beharko dira astelehenetik barikura 09:00etatik 14:00etara. Lanak egilearen sinadura gabe aurkeztu behar dira eta kartazal itxi batean egilearen identifikazio datuak sartu dira, hala nola, izen abizenak, adina, helbidea eta telefonoa. Epaimahaia Udaleko komunikazio arduradunak eta Arte Eskolako kideek osatuko dute, eta hartzen duten erabakia apelaezina izango da. Aurten, sari bakarra egono da; 400 eurokoa izango dena.
