219 triatleta batuko ditu zapatuan Mutrikuko Sprint Triatloiak
Bizikleta ibilbidean aldaketa esanguratsua egongo da aurten; korrikako ibilbideari dagokionez ere aldaketa txiki bat dago. Antolatzaileak pozik daude parte hartze datuarekin.
219 triatletek parte hartuko dute zapatuan [maiatzak 25] Mutrikuko 10. Sprint Triatloian. 16:30ean emango diote hasiera kirol probari eta kirolariek 750 metro igerian, 19kilometro bizikletan eta 5 kilometro korrikan egin beharko dituzte. Aurten, gainera, aldaketa esanguratsu bat edukiko du bizikleta ibilbideak.
Talaixa Triatloi Taldeak antolatzen du urtero ekitaldia eta aurten, baimena lortu ostean, lehenengo urteetan egiten zuten bizikleta ibilbidera bueltatzea lortu dute. “Triatloiaren lehenengo edizioetan egiten genuen ibilbidera bueltatuko gara, Debako bidea berreskuratuko dugu. Duela urte batzuk baimena ukatu ziguten ibilbide hori egiteko eta Kalbaixotik egin behar izan dugu ibilbidea. Malda esanguratsuak zituen ibilbide horrek, eta hau, ostera, lasaiagoa izango da. Batzuek nahiago izango dute, beste batzuek ez”. Malda txikiagoa izango du ibilbideak, nahiz eta distantzian antzeko ibilbidea izango den. Mutrikuko portutik abiatuta Debako bidea hartuko dute, Sasiolara abiatu, Kalbaixo igo eta berriz Mutrikuko portura jaitsiko dira. Korrikako ibilbideari dagokionez ere aldaketa txiki bat egongo da, hiru buelta eman beharko diote zirkuitu txikiari. “Azken urteetan bi buelta ematen ziren, baina dikearen amaierara arte ailegatzen zen ibilbidea. Orain bidea hori itxita dago geldik dauden obrak direla eta, hortaz, zirkuitua txikitu eta buelta kopurua handitu dugu”.
Parte hartzaileek 14:15etik 16:15era bitartean edukiko dute dortsalak jasotzeko aukera. 16:30ean gizonezkoen irteera ordua izango da, 5 minutu geroago (16:35) emakumezkoen irteera izango da. 19:00etan, ostera, sari banaketari emango diote hasiera. Antolatzaileak pozik daude probak edukitako erantzunarekin. “Oso pozik gaude, parte hartzaileen datua oso esanguratsua baita”. Horrez gain, eskertza egin nahi izan diete boluntarioei, laguntza hori jaso ezean, ez baitago probarik. “Boluntarioei benetan eskertu behar diegu egiten duten lana eta prestutasuna, beraiek gabe ezin dugu probak aurrera atera. Guretzat lehentasuna da parte hartzaileen segurtasuna bermatzea eta lan egin behar da horretarako”.
