Arriskuan dauden hizkuntzak erdigunean jarri ditu Aulestiko Udalak
Euskara ardatz hartuta kultur aniztasunaren astea burutuko da Aulestin, herrian erabiltzen diren hamabi hizkuntzei lekua emanez.
Kultur aniztasunaren astea antolatu dute Aulestin eta aulestiarrek erabili edota ezagutzen dituzten hizkuntzetan zentratuko dira. Euskara ardatz hartuta, hizkuntza aniztasunari lekua eman eta arriskuan dauden hizkuntzak ikustaraziko dituzte aste honetan.
Euskaraz gain, beste hamabi hizkuntza identifikatu dituzte: flandriera, Paraguaiko guaraniera, kitxua, urdu, punjabera, hindi, alemanera, arabiera, frantsesa, gaztelania eta ingelesa. “Horien artean, euskararekin batera, flandriera, Paraguaiko guaraniera, kitxua, urdu eta hindi hizkuntzak dira munduko hizkuntzen atlasean arrisku egoeran identifikatuta daudenak”, azaldu du Jon Zaratek, Aulestiko Udaleko aniztasunaz arduratzen den zinegotziak.
“Aulestin kultura aniztasunaren aldeko politikak garatzen ari gara eta ezinbestekoa iruditzen zaigu hizkuntza aniztasuna sustatzea”. Aulestira bizitzera datozenen beharrak ahalik eta egokien asetzeaz gain, euskararen eta euskal kulturaren egoeraren berri ematea da helburuetako bat: “Aulestiarrontzako euskararen aldeko bideak duen garrantzia azaltzen diegu, beraiek ere bide honen parte izatera gonbidatuz”.
Beraz, kultur aniztasunaren aste honetan ekimen desberdinak burutzen ari dira herrian. “Aste osoan zehar lehen hezkuntzako 5. eta 6. mailako ikasleek aurretiaz aipatutako hizkuntzei buruzko lanketa egingo dute, arriskuan dauden hizkuntzan erdigunean jarrita. Ondoren, ikasle gazteagoei eta herritarrei aurkeztuko die egindako lana”. Horrez gain, Hindi hizkuntzaren grafiaren inguruko saioa jasoko dute ikasleek, indiar jatorriko aulestiar baten eskutik.
Astea borobiltzeko, herrian dituzten hizkuntzak erabiliz bideo bat grabatu dute Zorionak zuri abestia kantatuz eta zapatuan [maiatzak 25] kultura ezberdinetako janariekin amaiera emango diote asteari: “Eskolan eta udalean landutako guztia kontuan hartuta, txokolatada bat antolatu dugu zapatu honetan, 19:30ak aldera”.
